జన గళం ఆంధ్రప్రదేశ్ డెస్క్: ఆంధ్రప్రదేశ్ పంచాయతీరాజ్ వ్యవస్థలో కూటమి ప్రభుత్వం కీలక మార్పులను అమల్లోకి తీసుకువచ్చింది. రాష్ట్రంలోని జిల్లా పరిషత్లలో ఒకరే వైస్ చైర్మన్, మండల పరిషత్లలో ఒకరే ఉపాధ్యక్షుడు ఉండేలా తీసుకొచ్చిన చట్ట సవరణ ఈ నెల 25వ తేదీ నుంచి అధికారికంగా అమలులోకి వస్తుందని ప్రభుత్వం సోమవారం ప్రకటించింది. ఈ మేరకు రాష్ట్ర పంచాయతీరాజ్ మరియు గ్రామీణాభివృద్ధి శాఖ అధికారిక గెజిట్ ఉత్తర్వులను జారీ చేసింది.
గతంలో జిల్లా పరిషత్లలో ఇద్దరు వైస్ చైర్మన్లు, మండల పరిషత్లలో ఇద్దరు ఉపాధ్యక్షులను ఎన్నుకునే నిబంధన అమల్లో ఉండేది. అయితే పరిపాలనా సౌలభ్యం, నిబంధనల సరళీకరణ లక్ష్యంగా ఆ రెండు పదవులను ఒకటికి కుదిస్తూ ప్రభుత్వం ఇటీవల శాసనసభలో చట్ట సవరణ బిల్లును ప్రవేశపెట్టి ఆమోదింపజేసింది. సభ ఆమోదం అనంతరం చట్టబద్ధమైన ప్రక్రియ పూర్తి కావడంతో, సెప్టెంబర్ 25 నుంచి ఈ నూతన విధానం రాష్ట్రవ్యాప్తంగా పూర్తిస్థాయిలో అమల్లోకి రానుంది.
