రచన: జన గళం ఎంటర్‌టైన్‌మెంట్ డెస్క్: భారత చలనచిత్ర చరిత్రలో ప్రయోగాలకు సరికొత్త భాష్యం చెప్పిన అరుదైన దార్శనికుడు, లెజెండరీ దర్శకుడు సింగీతం శ్రీనివాసరావు (94) తుదిశ్వాస విడిచారు. గత కొంతకాలంగా వయోభారిత సమస్యలతో బాధపడుతున్న ఆయన, చెన్నైలోని కావేరి ఆసుపత్రిలో చికిత్స పొందుతూ శనివారం రాత్రి కన్నుమూశారు. ఆయన మృతి వార్తతో తెలుగు, తమిళ, కన్నడ సినీ పరిశ్రమలతో పాటు యావత్ భారతీయ చిత్రసీమ తీవ్ర దిగ్భ్రాంతికి గురైంది.
దాదాపు ఆరు దశాబ్దాల పాటు సాగిన తన సుదీర్ఘ సినీ ప్రస్థానంలో సింగీతం శ్రీనివాసరావు వెండితెరపై సృష్టించిన అద్భుతాలు చిరస్మరణీయం. సంభాషణలు లేని మూకీ చిత్రంగా సంచలనం సృష్టించిన ‘పుష్పక విమానం’, భారతీయ సినిమాలోనే మొట్టమొదటి సైన్స్ ఫిక్షన్ టైమ్ ట్రావెల్ మూవీ ‘ఆదిత్య 369’, జానపద విజువల్ వండర్ ‘భైరవ ద్వీపం’, కృత్రిమ కాలితో డ్యాన్స్ చేసి ప్రపంచాన్ని మెప్పించిన సుధా చంద్రన్ జీవిత కథ ‘మయూరి’, కమల్ హాసన్ విలక్షణ నటనతో కూడిన ‘విచిత్ర సోదరులు’, ‘మైఖేల్ మదన కామరాజు’ వంటి చిత్రాలు ఆయన దర్శకత్వ ప్రతిభకు నిదర్శనాలు. 90 ఏళ్లు దాటిన వయసులోనూ సినిమాపై అమితమైన మక్కువతో పనిచేసిన సింగీతం అస్తమయం సినీ పరిశ్రమకు తీరని లోటని పలువురు సినీ, రాజకీయ ప్రముఖులు ప్రగాఢ సంతాపం వ్యక్తం చేశారు.
