రచన: జన గళం బ్యూరో, విజయవాడ: కృష్ణా జిల్లాలోని ఏడు శాసనసభ నియోజకవర్గాల్లో ప్రస్తుత రాజకీయ వాతావరణం, ప్రజాభిప్రాయాన్ని విశ్లేషిస్తూ ప్రవీణ్ పుల్లాట నేతృత్వంలోని ‘రైజ్ గ్రూప్’ (RISE Group) తాజాగా రూపొందించిన ‘పొలిటికల్ ఎక్స్‌రే 2026’ నివేదిక రాజకీయ వర్గాల్లో తీవ్ర చర్చనీయాంశంగా మారింది. క్షేత్రస్థాయి పరిశోధన ఆధారంగా విడుదల చేసిన ఈ అంచనాల ప్రకారం.. జిల్లాలోని ప్రధాన నియోజకవర్గాల్లో కూటమి పార్టీల బలాబలాలు, ప్రజల స్పందన విభిన్నంగా నమోదయ్యాయి.
ఈ సర్వే నివేదిక ప్రకారం పామర్రు, అవనిగడ్డ, మచిలీపట్నం నియోజకవర్గాలు కూటమికి అత్యంత క్లిష్టమైన ‘రిస్క్ జోన్’లో ఉన్నట్లు వెల్లడైంది. గన్నవరం, పెనమలూరు నియోజకవర్గాల్లో కూటమి పట్టు నిలుపుకుంటూ ఇప్పటికీ ‘సేఫ్ జోన్’లోనే కొనసాగుతున్నట్లు నివేదిక పేర్కొంది. కాగా, కీలకమైన గుడివాడ, పెడన నియోజకవర్గాల్లో ప్రజల నుంచి ‘మిశ్రమ స్పందన’ వ్యక్తమవుతోందని స్పష్టమైంది. స్థానిక ఎమ్మెల్యేల పనితీరు, ప్రజా సమస్యల పరిష్కారం, కూటమి పార్టీల మధ్య సమన్వయమే ఈ ఫలితాలపై ప్రభావం చూపుతున్నాయని, రాబోయే స్థానిక సంస్థల ఎన్నికల నేపథ్యంలో ఈ గ్రౌండ్ రిపోర్ట్ జిల్లా కూటమి నేతలకు హెచ్చరికగా మారిందని రాజకీయ విశ్లేషకులు భావిస్తున్నారు.
