జన గళం ఆంధ్రప్రదేశ్ డెస్క్: కృష్ణా జిల్లా నాగేశ్వరరావుపేట పంచాయతీ పరిధిలోని జానకిరాంపురం గ్రామంలో దీర్ఘకాలంగా పేరుకుపోయిన డ్రైనేజీ సమస్య పరిష్కారానికి ఎట్టకేలకు మోక్షం లభించింది. గ్రామంలోని నూతన వెనుకబడిన తరగతుల కాలనీ ప్రధాన రహదారి మురుగునీటితో జలమయమై తీవ్ర ఇబ్బందులు ఎదురవుతుండటంతో, ఇటీవల మహిళా సంఘం ప్రతినిధులు వినూత్నంగా మురుగు కాల్వలో చేప పిల్లలను వదిలి వినూత్న నిరసన వ్యక్తం చేశారు. మహిళలు చేపట్టిన ఈ పోరాటంపై పత్రికలు, దృశ్య మాధ్యమాలలో విస్తృతంగా వార్తలు రావడంతో అధికార యంత్రాంగంలో చలనం వచ్చింది.
మహిళల వినూత్న నిరసనకు తక్షణమే స్పందించిన పంచాయతీ అధికారులు, స్థానిక ప్రజాప్రతినిధులు కాలనీలోని మురుగు కాల్వ పూడికతీత పనులను అధికారికంగా ప్రారంభించారు. భారీ యంత్రాల సహాయంతో కాల్వల్లోని పూడిక, గుర్రపుడెక్కను తొలగించి మురుగునీరు సాఫీగా పారేలా పనులు ముమ్మరం చేశారు. సమస్య తీవ్రతను గుర్తించి సత్వరమే పనులు చేపట్టిన అధికారులకు, ప్రజాప్రతినిధులకు అఖిల భారత ప్రజాతంత్ర మహిళా సంఘం మండల కమిటీ ప్రత్యేక ధన్యవాదాలు తెలియజేసింది.
తమ సమస్య పరిష్కారం కావడాన్ని మహిళల ఐక్య పోరాట విజయంగా సంఘ నాయకులు అభివర్ణించారు. ప్రజా సమస్యలను వెలుగులోకి తెచ్చి పరిష్కారానికి సహకరించిన పత్రికా, దృశ్య మాధ్యమ విలేకరులకు మండల అధ్యక్ష, కార్యదర్శులు లంకదాసుల సుజాత, మాజేటి పద్మ కృతజ్ఞతలు తెలిపారు. ప్రజలు ఎదుర్కొనే సమస్యలపై అధికారులు ఇలాగే నిరంతరం వేగంగా స్పందించాలని వారు ఆకాంక్షించారు.