జన గళం జాతీయ డెస్క్: కర్ణాటకలోని ప్రసిద్ధ శైవక్షేత్రం గోకర్ణతో పాటు గోవా పరిసర ప్రాంతాలలో నిరంతరం ప్రజాహిత కార్యక్రమాలు చేపడుతూ, సామాజిక మరియు ఆధ్యాత్మిక సేవాతత్పరుడిగా విశేష సేవలందిస్తున్న ప్రముఖ పారిశ్రామికవేత్త నాగరాజ్ నాయక్ సేవలు ఎంతో అభినందనీయమని నేషనల్ యూనియన్ ఆఫ్ జర్నలిస్ట్స్ ఇండియా ఉపాధ్యక్షులు బడే ప్రభాకర్ కొనియాడారు. సమాజ హితం కోసం నాగరాజ్ నాయక్ చేస్తున్న నిస్వార్థ కృషిని గుర్తించి, న్యూఢిల్లీ జాతీయ పాత్రికేయుల సంఘం తరఫున ఆయనను ఘనంగా సత్కరించారు.
సోమవారం గోవాలోని నాగరాజ్ నాయక్ కార్యాలయంలో ప్రత్యేకంగా జరిగిన ఈ ఆత్మీయ సమావేశంలో బడే ప్రభాకర్ పాల్గొని ఆయనకు శాలువా కప్పి అభినందనలు తెలియజేశారు. సమాజంలో వెనుకబడిన వర్గాలకు చేయూతనిస్తూ, ఆలయాల అభివృద్ధి, ప్రజా సంక్షేమ కార్యక్రమాలలో నాగరాజ్ నాయక్ చూపిస్తున్న చొరవ నేటి సమాజానికి ఎంతో ఆదర్శనీయమని ఆయన ప్రశంసించారు. వ్యాపార రంగంలో రాణిస్తూనే సంపాదించిన దానిలో కొంత భాగాన్ని ప్రజా సేవకు వినియోగించే గుణం ఎందరికో స్ఫూర్తినిస్తుందని చెప్పారు.
భవిష్యత్తులో నాగరాజ్ నాయక్ మరిన్ని ఉన్నతమైన సేవా కార్యక్రమాలు చేపట్టి ప్రజాదరణ పొందాలని ఆయన ఆకాంక్షించారు. ఈ అభినందన సభలో మహానటి సావిత్రి కళాపీఠం నిర్వాహకురాలు విజయశ్రీ, ప్రముఖ వ్యాపార సంస్థల అధినేత బి. జీవన్ సహా పలువురు పాత్రికేయులు, ప్రముఖులు పాల్గొని నాగరాజ్ నాయక్‌కు శుభాకాంక్షలు తెలిపారు.
Slug: nuj-india-vice-president-bade-prabhakar-felicitates-social-activist-nagaraj-nayak-in-goa