జన గళం పెడన డెస్క్: కృష్ణా జిల్లా పెడన నియోజకవర్గ పరిధిలోని స్థానిక సంస్థల ఎన్నికల సమరంలో ఎన్డీయే కూటమి (టీడీపీ – జనసేన – బీజేపీ) ఐక్య కార్యాచరణతో ముందుకు సాగుతోంది. ఈ క్రమంలో పెడన నియోజకవర్గ జనసేన పార్టీ సమన్వయకర్త శ్రీ లింగం నాగేశ్వరరావు గారు కూటమి శ్రేణులు, జనసైనికులు, వీర మహిళలను ఉద్దేశించి కీలక పిలుపునిచ్చారు. ప్రజల ఆశీస్సులే కూటమి విజయానికి బలమైన పునాదులని, క్షేత్రస్థాయిలో ప్రతీ అడుగులోనూ కూటమి ఐక్యతను చాటాలని స్పష్టం చేశారు.
ఈ సందర్భంగా ఆయన మాట్లాడుతూ.. ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ గార్ల సుపరిపాలనలో గ్రామీణ ప్రాంతాల సమగ్ర వికాసం వేగవంతమైందని గుర్తుచేశారు. కూటమి ప్రభుత్వం అందిస్తున్న ప్రజా సంక్షేమం, అభివృద్ధిని ప్రతి గడపకూ తీసుకెళ్లి ప్రజల నమ్మకాన్ని పూర్తిస్థాయిలో చూరగొనాలని సూచించారు. పెడన నియోజకవర్గ పరిధిలోని మున్సిపాలిటీలు, జెడ్పీటీసీ, ఎంపీటీసీ స్థానాల్లో బరిలో నిలిచిన కూటమి అభ్యర్థులందరికీ శ్రేణులు కొండంత అండగా నిలవాలని కోరారు. టీడీపీ, జనసేన, బీజేపీ నాయకులు, కార్యకర్తలు విభేదాలకు తావులేకుండా సమిష్టిగా శ్రమించి, రాబోయే ఎన్నికల్లో కూటమి అభ్యర్థులను రికార్డు స్థాయి మెజారిటీలతో గెలిపించి విజయ శిఖరాలను అధిరోహించాలని పిలుపునిచ్చారు.
