జన గళం పెడన బ్యూరో: ఆంధ్రప్రదేశ్ రాష్ట్రంలో స్థానిక సంస్థల ఎన్నికల నగారా మోగే తరుణం సమీపిస్తుండటంతో పెడన మున్సిపాలిటీలో రాజకీయ వాతావరణం వేడెక్కింది. రాష్ట్ర ఎన్నికల సంఘం తాజా లెక్కల ఆధారంగా పెడన మున్సిపాలిటీ పరిధిలోని 28 వార్డుల సమగ్ర ఓటర్ల జాబితా వివరాలను జనసేన పార్టీ ఐటీ విభాగం విడుదల చేసింది. గతంలో 23 వార్డులుగా ఉన్న ఈ పురపాలక సంఘం, పునర్విభజన అనంతరం 28 వార్డులుగా మారగా.. మొత్తం ఓటర్ల సంఖ్య 25,373కి చేరింది. పురపాలక సంఘం పరిధిలో సగటున ఒక్కో వార్డుకు 906 మంది ఓటర్లు ఉన్నట్లు లెక్కలు స్పష్టం చేస్తున్నాయి.
ఈ జాబితా ప్రకారం.. పట్టణంలోనే అత్యధికంగా 17వ వార్డులో 1,186 మంది ఓటర్లు ఉండగా, అత్యల్పంగా 28వ వార్డులో 716 మంది ఓటర్లు నమోదయ్యారు. 34 శాతం బీసీ రిజర్వేషన్ల పెంపు అంశంపై సుప్రీంకోర్టు తీర్పు వెలువడిన వెంటనే వార్డుల వారీగా రిజర్వేషన్లు ఖరారు కానున్నాయని, అనంతరం ఎన్నికల షెడ్యూల్ విడుదలవుతుందని పార్టీ వర్గాలు పేర్కొన్నాయి. ఈ నేపథ్యంలో క్షేత్రస్థాయిలో వార్డుల వారీగా ఓటర్ల జాబితాను పరిశీలించుకుంటూ మున్సిపల్ ఎన్నికల పోరుకు సిద్ధం కావాలని జనసేన పార్టీ నాయకత్వం, ఐటీ విభాగం స్థానిక జనసైనికులకు పిలుపునిచ్చాయి.
