మంగళగిరి, 2026 సెప్టెంబర్ 20, (జనగళం బ్యూరో):
ఆంధ్రప్రదేశ్లో రానున్న స్థానిక సంస్థల ఎన్నికలే లక్ష్యంగా జనసేన పార్టీ కీలక అడుగులు వేస్తోంది. రాష్ట్ర ఉప ముఖ్యమంత్రి, జనసేన పార్టీ అధినేత శ్రీ పవన్ కళ్యాణ్ గారి అధ్యక్షతన ఈ నెల 22వ తేదీన కాకినాడ వేదికగా రాష్ట్ర స్థాయి సన్నాహక సమావేశాన్ని అత్యంత ప్రతిష్టాత్మకంగా నిర్వహించనున్నారు. ఈ మేరకు మంగళగిరిలోని జనసేన పార్టీ కేంద్ర కార్యాలయం ఆదివారం అధికారిక ప్రకటన విడుదల చేసింది.
వివరాలు ఇలా ఉన్నాయి, ఈ ఉన్నత స్థాయి సమావేశానికి జనసేన పార్టీకి చెందిన ఎంపీలు, మంత్రులు, శాసనసభ్యులు (ఎమ్మెల్యేలు), శాసనమండలి సభ్యులు (ఎమ్మెల్సీలు), కార్పొరేషన్ ఛైర్మన్లతో పాటు రాష్ట్రంలోని 25 పార్లమెంటరీ నియోజకవర్గాల పరిధిలో నూతనంగా నియమించిన స్థానిక సంస్థల సమన్వయకర్తలు, సమన్వయ కమిటీల సభ్యులు, సపోర్ట్ టీమ్ సభ్యులు తప్పనిసరిగా హాజరుకావాలని పార్టీ పేర్కొంది.
ఎన్నికల వ్యూహం – కూటమి సమన్వయంపై దిశానిర్దేశం:
రాష్ట్రంలో జరగనున్న స్థానిక సంస్థల ఎన్నికలను పురస్కరించుకుని నియోజకవర్గాల వారీగా పార్టీ చేపట్టాల్సిన ముందస్తు సన్నద్ధత, క్షేత్రస్థాయిలో పార్టీ కార్యక్రమాల విస్తరణ, క్యాడర్ను సమాయత్తం చేసే మార్గాలపై అధినేత పవన్ కళ్యాణ్ పూర్తిస్థాయిలో సమాలోచనలు చేయనున్నారు. అదేవిధంగా కూటమి భాగస్వామ్య పక్షాలైన తెలుగుదేశం, బీజేపీలతో మండల, గ్రామ, వార్డు స్థాయిల్లో సమన్వయాన్ని ఎలా ముందుకు తీసుకెళ్లాలనే అంశంపై నాయకులకు స్పష్టమైన కార్యాచరణను వివరించనున్నారు. ఎన్నికల్లో కూటమి విజయదుందుభి మోగించేలా అనుసరించాల్సిన వ్యూహాలపై కాకినాడ వేదికగా పవన్ దిశానిర్దేశం చేయనుండటంతో ఈ సమావేశం రాజకీయ వర్గాల్లో తీవ్ర ప్రాధాన్యత సంతరించుకుంది.