హైదరాబాద్, 2026 సెప్టెంబర్ 20, (జనగళం బ్యూరో):
తెలంగాణ రాష్ట్ర వ్యాప్తంగా జనసేన పార్టీ విస్తరణ దిశగా వేగంగా అడుగులు వేస్తోంది. పార్టీ అధినేత శ్రీ పవన్ కళ్యాణ్ గారి విలువలతో కూడిన రాజనీతి, నిజాయితీ మరియు ప్రజా సంక్షేమానికి పెద్దపీట వేసే పాలనా విధానాల పట్ల ఆకర్షితులై తెలంగాణలోని బీఆర్ఎస్, కాంగ్రెస్, టీడీపీ సహా పలు ప్రజా సంఘాలు, స్వచ్ఛంద సంస్థలకు చెందిన 27 మంది ముఖ్య నాయకులు, యువత శనివారం సామూహికంగా జనసేన పార్టీ తీర్థం పుచ్చుకున్నారు.
వివరాలు ఇలా ఉన్నాయి, జనసేన నాయకులు శ్రీ ఎం.ఎన్. జైసింహ పడాల గారి ఆధ్వర్యంలో తరలివచ్చిన ఈ నాయకులను జనసేన పార్టీ తెలంగాణ రాష్ట్ర ఇన్చార్జ్ శ్రీ నేమూరి శంకర్ గౌడ్ పార్టీ కండువాలు కప్పి సాదరంగా ఆహ్వానించారు. ఈ సందర్భంగా నిర్వహించిన సమావేశంలో పార్టీలో చేరిన నాయకులు మాట్లాడుతూ.. ప్రస్తుతం ఉన్న కలుషిత రాజకీయాల్లో పవన్ కళ్యాణ్ మాత్రమే నైతిక విలువలతో కూడిన మార్పును తీసుకురాగలరని, అందుకే స్వచ్ఛందంగా ఆయన బాటలో నడిచేందుకు సిద్ధమయ్యామని స్పష్టం చేశారు.
ప్రతి కార్యకర్తకూ సముచిత ప్రాధాన్యత – నేమూరి శంకర్ గౌడ్:
ఈ కార్యక్రమంలో తెలంగాణ రాష్ట్ర ఇన్చార్జ్ శ్రీ నేమూరి శంకర్ గౌడ్ మాట్లాడుతూ.. పవన్ కళ్యాణ్ సిద్ధాంతాలకు ప్రజల్లో పెరుగుతున్న ఆదరణకు ఈ చేరికలే నిదర్శనమన్నారు. స్వార్థ ప్రయోజనాలు పక్కనబెట్టి ప్రజా పక్షాన నిలబడే ఏకైక పార్టీ జనసేన అని కొనియాడారు. తెలంగాణ గడ్డపై జనసేనను తిరుగులేని రాజకీయ శక్తిగా తీర్చిదిద్దేందుకు యువత, సీనియర్ నాయకులు కలిసికట్టుగా కృషి చేయాలని పిలుపునిచ్చారు. పార్టీని నమ్ముకుని వచ్చిన ప్రతి ఒక్కరికీ నాయకత్వంలో సముచిత ప్రాధాన్యత, గౌరవం కల్పిస్తామని ఆయన భరోసా ఇచ్చారు. ఈ కార్యక్రమంలో జనసేన రాష్ట్ర, నగర స్థాయి నాయకులు, జనసైనికులు, వీరమహిళలు పెద్ద సంఖ్యలో పాల్గొన్నారు.