జన గళం ప్రత్యేక డెస్క్: స్థానిక సంస్థల ఎన్నికల సమరంలో నెల్లూరు మున్సిపల్ కార్పొరేషన్ వేదికగా జనసేన పార్టీ రాష్ట్ర ప్రధాన కార్యదర్శి శ్రీ తమ్మిరెడ్డి శివశంకరరావు (శివశంకర్) గారు తీసుకున్న తెగువతో కూడిన నిర్ణయం ఇప్పుడు రాష్ట్రవ్యాప్తంగా సామాజిక మాధ్యమాల్లో పెను సంచలనంగా మారింది. రాజకీయాల్లో పదవుల కోసమో, తాత్కాలిక సర్దుబాట్ల కోసమో తలొగ్గి నామమాత్రపు సీట్లతో సరిపెట్టుకునే నాయకులు ఉన్న ఈ రోజుల్లో.. పార్టీ ఆత్మగౌరవం, కార్యకర్తల శ్రమకు తగిన న్యాయం జరగనప్పుడు ఒంటరి పోరుకైనా సిద్ధమంటూ ఆయన చూపించిన ధైర్యం నెటిజన్లను, జనసేన శ్రేణులను అమితంగా ఆకట్టుకుంటోంది. “శివశంకరరావు గారు.. మీరు నిజమైన మొనగాడు సార్!” అంటూ సోషల్ మీడియా వేదికగా ఆయన నాయకత్వ పటిమపై ప్రశంసల వర్షం కురుస్తోంది.
నెల్లూరు కార్పొరేషన్ పరిధిలో కూటమి సీట్ల పంపకాల చర్చల్లో జనసేన బలానికి ఏమాత్రం పొంతన లేని విధంగా అత్యంత తక్కువ సీట్లను కేటాయించేందుకు మొగ్గు చూపిన తరుణంలో.. ఏమాత్రం రాజీపడకుండా ఆయన నిలబడ్డారు. కార్యకర్తలను విస్మరించి చేసే ఏ పొత్తూ పార్టీకి శ్రేయస్కరం కాదని తేల్చిచెబుతూ, పార్టీ డిమాండ్ చేసిన 30 శాతం వార్డుల్లో నేరుగా బరిలోకి దిగుతామని విలేకరుల సమావేశం పెట్టి నిక్కచ్చిగా ప్రకటించడం ఆయనలోని తిరుగులేని నాయకత్వ లక్షణానికి నిదర్శనమని కేడర్ కొనియాడుతోంది.
సోషల్ మీడియాలో సాధారణంగా పార్టీల అంతర్గత వ్యవహారాలు, లాలూచీ రాజకీయాలపై నిరాశతో ఉండే యువత సైతం.. తమ్మిరెడ్డి శివశంకర్ గారి వైఖరిని చూసి గర్విస్తోంది. నాయకుడంటే ఇలా ఉండాలని, క్షేత్రస్థాయిలో రక్తం ధారపోసే క్యాడర్ కోసం అధిష్టానం ముందు, మిత్రపక్షాల ముందు గొంతు ఎత్తి నిలబడే వారే అసలైన నాయకులని చర్చించుకుంటున్నారు. పదవుల కంటే పార్టీ సిద్ధాంతాలు, కార్యకర్తల ఆత్మగౌరవమే అత్యున్నతమని నిరూపించిన తమ్మిరెడ్డి శివశంకర్ గారి నిర్ణయం రాబోయే రోజుల్లో పార్టీకి మరింత బలాన్ని చేకూరుస్తుందని విశ్లేషకులు భావిస్తున్నారు.