jangalam24 ఆంధ్రప్రదేశ్ డెస్క్: తిరుపతి జిల్లాలో త్వరలో జరగనున్న స్థానిక సంస్థల ఎన్నికలను అత్యంత ప్రతిష్ఠాత్మకంగా తీసుకున్న జనసేన పార్టీ, క్షేత్రస్థాయిలో సమరశంఖం పూరించేందుకు వేగంగా అడుగులు వేస్తోంది. అందులో భాగంగా జిల్లాలోని వెంకటగిరి, గూడూరు నియోజకవర్గాల్లో పార్టీని సంస్థాగతంగా మరింత బలోపేతం చేయడంతో పాటు ఎన్నికల కార్యాచరణను ముమ్మరం చేశారు. రెండు నియోజకవర్గాల్లో పార్టీ బలబలాలు, క్షేత్రస్థాయి పరిస్థితులపై సమగ్ర సమాచారాన్ని సేకరించేందుకు పార్టీ ముఖ్య నేతలు ప్రత్యేకంగా రంగంలోకి దిగి క్షేత్రస్థాయి పరిశీలన చేపట్టారు.
ఈ కసరత్తులో భాగంగా వెంకటగిరి, గూడూరు నియోజకవర్గాల్లోని వార్డులు, పంచాయతీల వారీగా పార్టీకి గల సంపూర్ణ బలాన్ని అంచనా వేస్తున్నారు. స్థానిక సంస్థల బరిలో నిలిచేందుకు ఉత్సాహం చూపుతున్న ఆశావహుల వివరాలు, వారి ప్రజాదరణ, సామాజిక సమీకరణాలను నేరుగా సేకరిస్తున్నారు. పార్టీ విజయావకాశాలు మెండుగా ఉన్న వార్డులను ప్రాధాన్యతా క్రమంలో గుర్తించి, అక్కడ అనుసరించాల్సిన రాజకీయ వ్యూహాలపై స్థానిక ముఖ్య నాయకులతో అంతర్గత సమావేశాలు నిర్వహించి సమగ్రంగా చర్చించారు.
ఈ సన్నాహక సమావేశాలు, వివరాల సేకరణ కార్యక్రమంలో జనసేన పార్టీ ముఖ్య నాయకులతో పాటు వీర మహిళలు, క్రియాశీల కార్యకర్తలు పెద్ద సంఖ్యలో పాల్గొన్నారు. క్షేత్రస్థాయిలో పార్టీ అధినేత పవన్ కల్యాణ్ ఆశయాలు, కూటమి అభివృద్ధి సంక్షేమ పథకాలను ప్రజల్లోకి బలంగా తీసుకెళ్లాలని నేతలు శ్రేణులకు పిలుపునిచ్చారు. స్థానిక ఎన్నికల్లో సత్తా చాటేందుకు కార్యకర్తలు అంతా సమష్టిగా పనిచేయాలని, వార్డు స్థాయి నుంచి పటిష్టమైన యంత్రాంగాన్ని సిద్ధం చేసి అభ్యర్థుల విజయానికి బాటలు వేయాలని నిర్ణయించారు.