జన గళం పొలిటికల్ బ్యూరో, ఆంధ్రప్రదేశ్: ఎన్నికలు దగ్గరపడుతున్న కొద్దీ నగర రాజకీయాల్లో ఒక విచిత్రమైన కామెడీ కనిపిస్తోంది. పట్టుమని పదిమందిలో మాట్లాడటం చేతగానివారు, వీధి సమస్యలపై కనీస అవగాహన లేనివాళ్లు కూడా నిస్సిగ్గుగా “నేనే మేయర్ అభ్యర్థిని” అంటూ వీధికో ఫ్లెక్సీ కట్టుకుని తిరుగుతున్నారు. చేతిలో కాస్త డబ్బుంది కదా అని, నాలుగు కార్లు వెంటేసుకుని తిరిగితే నగర ప్రథమ పౌరుడి పీఠం దక్కిపోతుందా? అసలు మేయర్ అంటే ఏమనుకుంటున్నారు? కేవలం పదవి అనుభవించి, రిబ్బన్లు కట్ చేయడానికి మాత్రమేనా లేక మహానగర భవిష్యత్తును నడిపించే సత్తా ఉండాలా? ఇప్పుడు నగర ప్రజల్లో, విద్యావంతుల్లో తీవ్రస్థాయిలో ఆగ్రహావేశాలు రగులుతున్నాయి.
- మూడు నుంచి ఐదుగురు ఎమ్మెల్యేలను హ్యాండిల్ చేయగలరా?
ఒక మహానగర పరిధిలో తక్కువలో తక్కువ 3 నుంచి 5 అసెంబ్లీ నియోజకవర్గాలు ఉంటాయి. అక్కడ గెలిచి కూర్చున్న ఉద్దండులైన ఎమ్మెల్యేలు, వారి గ్రూపు రాజకీయాలను సమన్వయం చేసుకుంటూ, నగర ప్రయోజనాల కోసం వారిని ఒప్పించి మెప్పించగల రాజకీయ పరిపక్వత, హుందాతనం ఈ స్వయం ప్రకటిత అభ్యర్థులకు ఉందా? సొంత వార్డులో కార్పొరేటర్‌ను దారిలోకి తెచ్చుకోలేని అసమర్థులు, హేమాహేమీలైన ఎమ్మెల్యేలతో ఎలా నెట్టుకొస్తారు? - మున్సిపల్ యాక్ట్ ఏబీసీడీలు తెలుసా?
మున్సిపల్ చట్టాలు, జీవోలు, బైలాస్ గురించి కనీస ప్రాథమిక జ్ఞానం లేని అజ్ఞానులు మేయర్ కావాలని కలలు కంటున్నారు. కౌన్సిల్ మీటింగ్‌లో అజెండా ఎలా రూపొందించాలి? చట్టబద్ధమైన తీర్మానాలు ఎలా ఆమోదింపజేయాలి? అన్నది తెలియకుండా కుర్చీలో కూర్చుంటే అధికారుల చేతుల్లో కీలుబొమ్మలు కావడం తప్ప ఇంకేం జరుగుతుంది? - ఐఏఎస్ క్యాడర్ కమిషనర్‌తో పనులు చేయించే సీన్ ఉందా?
నగర మున్సిపల్ కమిషనర్‌గా ఉండేది అత్యున్నత ఐఏఎస్ కేడర్ అధికారి. అడ్మినిస్ట్రేషన్‌పై పట్టు సాధించి, నిధులు రాబట్టి, నగర అభివృద్ధి ప్రణాళికలను అధికారులతో పరుగులు పెట్టించగల సత్తా, అడ్మినిస్ట్రేటివ్ నాలెడ్జ్ వీరికి ఉందా? ఫైలు మీద సంతకం తప్ప మరో అక్షరం చదవలేని వీళ్లు ఐఏఎస్ అధికారులతో కలిసి నగర రూపురేఖలు ఎలా మారుస్తారు? - ‘జెన్-జీ’ (Gen-Z) ప్రశ్నించే తత్వాన్ని తట్టుకోగలరా?
ఇది పాతకాలం నాటి మొక్కుబడి రాజకీయం కాదు! జెన్-జీ (Gen-Z), జెన్-ఆల్ఫా యుగంలో జీవిస్తున్నాం. సోషల్ మీడియాలో నిలదీసే తత్వం, అంతర్జాతీయ స్థాయి మౌలిక వసతులు కోరుకునే యువత ప్రశ్నిస్తుంటే సమాధానం చెప్పే ధైర్యం వీళ్లకుందా? విజన్ లేని ఇలాంటి డమ్మీలు యువత ఆకాంక్షలను ఎలా నెరవేరుస్తారు? - ఆకస్మిక విపత్తులు వస్తే పత్తా లేకుండా పోతారా?
వరదలు, తుఫానులు లేదా ఇతర ఎమర్జెన్సీ పరిస్థితులు నగరంలో తలెత్తితే అర్థరాత్రి రోడ్ల మీదకు వచ్చి విపత్తు నిర్వహణ (Disaster Management) చేపట్టే కనీస సమయస్ఫూర్తి ఉందా? లేక ఆ సమయంలో ఏసీ గదుల్లో దాక్కుని అధికారుల మీద నెపం నెట్టేస్తారా?
డబ్బు హంగులు, పార్టీల్లోని పైరవీలు చూసి ఇలాంటి పనికిరాని అభ్యర్థులను పార్టీలు తెరపైకి తెస్తే నగర భవిష్యత్తు అంధకారమవడం ఖాయం. పార్టీ పెద్దలు ఇప్పటికైనా కళ్లు తెరిచి.. కేవలం డబ్బే అర్హతగా కాకుండా, పరిపాలనా దక్షత, విద్యావంతుడైన విజనరీని మేయర్ బరిలో నిలపాలని, లేదంటే ప్రజలు ఎన్నికల్లో చెప్పుతో కొట్టినట్టు బుద్ధి చెప్పడం ఖాయమని సర్వత్రా హెచ్చరికలు జారీ అవుతున్నాయి!