జన గళం మచిలీపట్నం డెస్క్: మచిలీపట్నం పార్లమెంట్ నియోజకవర్గ పరిధిలో గోవా షిప్యార్డు లిమిటెడ్ ఆధ్వర్యంలో భారీ రక్షణ, నౌకా నిర్మాణ ప్రాజెక్టు ఏర్పాటుకు రాష్ట్ర కేబినెట్ ఆమోదం తెలిపిందని ఎంపీ వల్లభనేని బాలశౌరి కార్యాలయం వెల్లడించింది. ఈ నిర్ణయంపై ఎంపీ బాలశౌరి హర్షం వ్యక్తం చేస్తూ ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్, రాష్ట్ర కేబినెట్కు కృతజ్ఞతలు తెలిపారు.
ఎంపీ కార్యాలయం వెల్లడించిన వివరాల ప్రకారం, సుమారు రూ.8,000 కోట్ల పెట్టుబడితో మచిలీపట్నం పోర్టు కేంద్రంగా గోవా షిప్యార్డు ఏర్పాటు కానుంది. ఈ ప్రాజెక్టు ద్వారా సుమారు 3,000 మందికి ప్రత్యక్షంగా, మరో 5,000 మందికి పరోక్షంగా ఉద్యోగ, ఉపాధి అవకాశాలు లభించే అవకాశం ఉందని బాలశౌరి పేర్కొన్నారు.
గోవా షిప్యార్డు లిమిటెడ్ చేపట్టనున్న ఈ విస్తరణ ప్రాజెక్టు ద్వారా మచిలీపట్నం రక్షణ, నౌకా నిర్మాణ రంగంలో కీలక కేంద్రంగా అభివృద్ధి చెందే అవకాశం ఉందని ఎంపీ తెలిపారు. భారత నౌకాదళం, కోస్ట్గార్డ్ అవసరాలకు అనుగుణంగా నౌకల నిర్మాణం, మరమ్మతుల కార్యకలాపాలకు ఈ ప్రాజెక్టు దోహదపడుతుందని పేర్కొన్నారు.
ఈ ప్రాజెక్టు అమలు ద్వారా మచిలీపట్నం ప్రాంతంలో పారిశ్రామిక కార్యకలాపాలు, అనుబంధ రంగాల్లో అవకాశాలు పెరిగే అవకాశం ఉందని ఎంపీ కార్యాలయం తన ప్రకటనలో పేర్కొంది.