జన గళం ఆంధ్రప్రదేశ్ డెస్క్: అన్నమయ్య జిల్లా మదనపల్లె పట్టణంలో మాదిగ దళ పోరాట సమితి (ఎండీపీఎస్) నూతన మండల కమిటీ నియామకం బుధవారం లాంఛనంగా జరిగింది. సంఘం వ్యవస్థాపకులు, ఆంధ్రప్రదేశ్ రాష్ట్ర అధ్యక్షులు పెద్దపల్లి శేఖర్ ఆదేశాల మేరకు, జిల్లా అధ్యక్షులు పెద్దపల్లి అశోక్ కుమార్ సూచనలతో జిల్లా ఇంఛార్జి వేణుగోపాల్ ఆధ్వర్యంలో ఈ నూతన కార్యవర్గాన్ని ఏకగ్రీవంగా ఎన్నుకున్నారు. ఈ కార్యక్రమానికి సంఘం శ్రేణులు, నాయకులు పెద్ద సంఖ్యలో హాజరయ్యారు.
ఈ సందర్భంగా జిల్లా ఇంఛార్జి వేణుగోపాల్ మాట్లాడుతూ రాష్ట్ర అధ్యక్షులు పెద్దపల్లి శేఖర్ ఆశయాలకు అనుగుణంగా నూతన కమిటీ బాధ్యులు అంకితభావంతో పనిచేయాలని పిలుపునిచ్చారు. మాదిగ దళ పోరాట సమితి సిద్ధాంతాలను క్షేత్రస్థాయిలోకి తీసుకెళ్తూ, మాదిగలు అన్ని రంగాలలో సమాన అవకాశాలు సాధించి అగ్రవర్ణాలతో సమానంగా అభివృద్ధి చెందేలా సమష్టిగా కృషి చేయాలని సూచించారు. సమాజంలో మాదిగ జాతి బిడ్డలకు ఎలాంటి ఆపద, సమస్య ఎదురైనా తక్షణమే స్పందించి, వాటి పరిష్కారానికి బాసటగా నిలవాలని ఆయన కార్యవర్గానికి స్పష్టం చేశారు.
ఈ నూతన కమిటీలో ఎండీపీఎస్ మదనపల్లె మండల అధ్యక్షుడిగా ఎం. శ్రీనివాసులు, మండల ఇంఛార్జిగా పవన్ కుమార్, మండల ఉపాధ్యక్షుడిగా రామ్మూర్తి, మండల గౌరవ అధ్యక్షుడిగా కళ్యాణ్ నియమితులయ్యారు. అలాగే మండల అధికార ప్రతినిధిగా మద్దిలేటి, మండల ప్రధాన కార్యదర్శిగా బన్నీ, మండల కార్యదర్శిగా రోహిత్, మండల ప్రచార కార్యదర్శిగా అనిల్, మండల కోఆర్డినేటర్ గా నాగేంద్రలతో పాటు మండల సలహాదారులుగా ఆదినారాయణ, కౌశిక్, హేమంత్ లను నియమించారు.
తమపై విశ్వాసంతో కీలక బాధ్యతలు అప్పగించిన రాష్ట్ర, జిల్లా నాయకత్వానికి నూతన కమిటీ సభ్యులు హృదయపూర్వక ధన్యవాదాలు తెలియజేశారు. సమాజంలో అణగారిన వర్గాల హక్కుల పరిరక్షణకు, ప్రజా సమస్యల పరిష్కారానికి నిరంతరం అండగా ఉంటామని, సంఘం అభివృద్ధికి తమ వంతు బాధ్యతను చిత్తశుద్ధితో నిర్వర్తిస్తామని నూతన కార్యవర్గ ప్రతినిధులు పేర్కొన్నారు.
Slug: madanapalle-mdps-new-committee-appointed-m-srinivasulu-president