జన గళం ప్రత్యేక ప్రతినిధి, విజయవాడ: రాజధాని నగరంగా విరాజిల్లుతున్న విజయవాడలో కొద్దిపాటి వర్షం కురిసినా ప్రధాన రహదారులు నదులను, చెరువులను తలపిస్తున్నాయి. పాలకులు, యంత్రాంగం వేల కోట్ల రూపాయలతో నగరాన్ని అభివృద్ధి చేస్తున్నామని ఆర్భాటంగా ప్రకటనలు గుప్పిస్తున్నప్పటికీ క్షేత్రస్థాయిలో పరిస్థితి మాత్రం అత్యంత దయనీయంగా మారిందని స్థానికులు తీవ్ర అసహనం వ్యక్తం చేస్తున్నారు. ముఖ్యంగా నగరంలో అత్యంత కీలకమైన పటమట నిర్మల కాన్వెంట్ ప్రధాన రహదారిపై చిన్నపాటి వర్షానికే మోకాళ్ల లోతు వరద నీరు నిలిచిపోయి ప్రజలు నరకయాతన అనుభవిస్తున్నారు. నిత్యం వేలాది మంది పాఠశాల విద్యార్థులు, కళాశాల యువతులు, ఉద్యోగులు మరియు పాదచారులు రాకపోకలు సాగించే ఈ మార్గంలో డ్రైనేజీ వ్యవస్థ పూర్తిగా అస్తవ్యస్తంగా మారింది.
రహదారిపై పెద్ద ఎత్తున నీరు నిలిచిపోవడంతో పాటు ఒకవైపు నీటిలోనే మునిగిపోయిన కరెంటు స్తంభాలు, ప్రమాదకరంగా మారిన ఓపెన్ మ్యాన్హోల్స్ ప్రజలను, విద్యార్థులను క్షణక్షణం భయాందోళనలకు గురిచేస్తున్నాయి. నీటిలో గుంతలు, మ్యాన్హోల్స్ ఎక్కడున్నాయో కనిపించక ద్విచక్ర వాహనదారులు, పాదచారులు ఏ క్షణాన ప్రమాదానికి గురవుతామోనని ప్రాణాలు అరచేతిలో పెట్టుకుని ప్రయాణించాల్సిన దుస్థితి నెలకొంది. కరెంటు స్తంభాల నుంచి ఎక్కడ విద్యుత్ సరఫరా నీటిలోకి ప్రవహిస్తుందోనన్న భయం బాటసారులను వెంటాడుతోంది. ఇంతటి తీవ్రమైన సమస్య ఉన్నప్పటికీ మున్సిపల్ అధికారులకు చీమ కుట్టినట్లయినా లేదని తల్లిదండ్రులు, స్థానికులు మండిపడుతున్నారు. పాలకులు మారినా తమ రోడ్డు కష్టాలు తీరడం లేదని, ఇకనైనా వీఎంసీ అధికారులు నిద్రమత్తు వీడి యుద్ధప్రాతిపదికన డ్రైనేజీ పూడికతీత పనులు చేపట్టి, ప్రమాదకరంగా ఉన్న కరెంటు స్తంభాలు, మ్యాన్హోల్స్కు రక్షణ చర్యలు చేపట్టాలని ప్రజలు ముక్తకంఠంతో డిమాండ్ చేస్తున్నారు.
