జన గళం ఆంధ్రప్రదేశ్ డెస్క్: తుపాను ప్రభావంతో నగరంలో కురుస్తున్న భారీ వర్షాల నేపథ్యంలో విజయవాడ నగరపాలక సంస్థ (వీఎంసీ) 53వ డివిజన్ పరిధిలో డ్రైనేజీ వ్యవస్థను, వర్షపు నీటి ప్రవాహ పరిస్థితులను స్థానిక కార్పొరేటర్, జనసేన పార్టీ సీనియర్ నాయకులు శ్రీ మహాదేవ అప్పాజీ క్షేత్రస్థాయిలో స్వయంగా పరిశీలించారు. వర్షాల కారణంగా కాలనీల్లోని ప్రధాన రహదారులు, అంతర్గత వీధుల్లో నీరు నిలిచిపోకుండా మున్సిపల్ అధికారులతో కలిసి డివిజన్లోని పలు ప్రాంతాల్లో ఆయన విస్తృతంగా పర్యటించారు.
వరద నీరు సాఫీగా బయటకు వెళ్లేలా డ్రైనేజీ కాల్వల్లో పేరుకుపోయిన పూడిక, చెత్తాచెదారాన్ని తక్షణమే తొలగించాలని శానిటేషన్, ఇంజనీరింగ్ సిబ్బందిని ఆయన ఆదేశించారు. లోతట్టు ప్రాంతాల ప్రజలకు ఎటువంటి అసౌకర్యం కలగకుండా ఎప్పటికప్పుడు అప్రమత్తంగా ఉండాలని సూచించారు. విపత్తు వేళ ప్రజలకు ఎలాంటి ఇబ్బందులు తలెత్తినా వెంటనే తమ దృష్టికి తీసుకురావాలని, అధికారులు మరియు ప్రజాప్రతినిధులు సమన్వయంతో పనిచేస్తూ సమస్యలను పరిష్కరిస్తారని అప్పాజీ భరోసా ఇచ్చారు. ఈ పరిశీలన కార్యక్రమంలో స్థానిక నాయకులు, జనసేన కార్యకర్తలు మరియు వార్డు సచివాలయ సిబ్బంది పాల్గొన్నారు.
