జన గళం ఆంధ్రప్రదేశ్ డెస్క్: ఏలూరు జిల్లా నూజివీడు పట్టణంలోని 15వ వార్డు ఎన్టీఆర్ కాలనీలో సుదీర్ఘ కాలంగా నెలకొన్న మురుగునీటి సమస్యకు శాశ్వత పరిష్కారం లభించింది. గతంలో చిన్నపాటి వర్షం కురిసినా కాలనీలోని వీధులన్నీ చెరువులను తలపించేలా నీటమునిగి, ఇళ్లలోకి వరద నీరు చేరి స్థానిక ప్రజలు తీవ్ర నరకయాతన అనుభవించేవారు. కాలినడకన బయటకు రావాలన్నా, ద్విచక్ర వాహనాలపై ప్రయాణించాలన్నా స్థానికులు భయపడే పరిస్థితులు ఉండేవి.
అయితే, రాష్ట్ర గృహనిర్మాణ మరియు సమాచార పౌర సంబంధాల శాఖ మంత్రివర్యులు శ్రీ కొలుసు పార్థసారథి గారి ప్రత్యేక చొరవ, అభివృద్ధి నిధులతో ఎన్టీఆర్ కాలనీలో ఆధునిక డ్రైనేజీ వ్యవస్థను పటిష్టంగా నిర్మించారు. ఫలితంగా ఇటీవల ఎడతెరిపి లేకుండా కురుస్తున్న భారీ వర్షాల్లో సైతం ఎక్కడా నీరు నిలవకుండా డ్రైనేజీ కాల్వల ద్వారా సులభంగా బయటకు వెళ్లిపోతోంది. దీంతో కాలనీ రోడ్లు పరిశుభ్రంగా దర్శనమిస్తున్నాయి. దశాబ్దాల సమస్యకు శాశ్వత విముక్తి కల్పించినందుకు ఎన్టీఆర్ కాలనీ వాసులు ఆనందం వ్యక్తం చేస్తూ మంత్రి కొలుసు పార్థసారథి గారికి హృదయపూర్వక కృతజ్ఞతలు తెలియజేశారు. నూజివీడు నియోజకవర్గంలో ప్రజా సమస్యల పరిష్కారమే లక్ష్యంగా అభివృద్ధి పనులు పరుగులు తీస్తున్నాయని స్థానిక నాయకులు పేర్కొన్నారు.
