జన గళం ఆంధ్రప్రదేశ్ డెస్క్: గుడివాడ నియోజకవర్గ ప్రజల సమస్యలను సత్వరమే పరిష్కరించడమే ప్రభుత్వ ప్రధాన లక్ష్యమని జిల్లా కలెక్టర్ డీకే బాలాజి స్పష్టం చేశారు. నియోజకవర్గ ప్రజల నుంచి నేరుగా అర్జీలను స్వీకరించి, వాటికి తక్షణ పరిష్కారం చూపే ఉద్దేశంతో గుడివాడలో ప్రత్యేకంగా ప్రజా సమస్యల పరిష్కార వేదిక మీకోసం కార్యక్రమం నిర్వహించారు. ఈ కార్యక్రమంలో గుడివాడ శాసన సభ్యుడు వెనిగండ్ల రాముతో కలిసి జిల్లా కలెక్టర్ స్వయంగా పాల్గొని ప్రజల నుంచి వినతిపత్రాలను స్వీకరించారు. వివిధ సమస్యలపై వచ్చిన అర్జీదారులతో నేరుగా మాట్లాడి వారి ఇబ్బందులను ఓపికగా ఆలకించారు.
అర్జీలను క్షుణ్ణంగా పరిశీలించిన కలెక్టర్, సమస్యల స్వభావాన్ని బట్టి సంబంధిత శాఖల అధికారులను అక్కడికక్కడే అప్రమత్తం చేశారు. ప్రజలు తమ సమస్యల పరిష్కారం కోసం ప్రభుత్వ కార్యాలయాల చుట్టూ తిరిగే దుస్థితి తలెత్తకూడదని, ప్రతి అర్జీని నిర్ణీత గడువులోగా పరిష్కరించాలని అధికారులను ఆదేశించారు. అధికారుల మధ్య సమన్వయం లోపించకుండా, ప్రజల నుంచి వచ్చే ప్రతి విజ్ఞప్తికి అత్యంత ప్రాధాన్యత ఇవ్వాలని సూచించారు. రాబోయే మూడు వారాల పాటు కూడా ప్రతీ శుక్రవారం నియోజకవర్గస్థాయిలో ప్రత్యేక మీకోసం కార్యక్రమాలు కొనసాగుతాయని ఆయన వెల్లడించారు.
ప్రభుత్వం కల్పిస్తున్న ఈ సదవకాశాన్ని నియోజకవర్గ ప్రజలు సద్వినియోగం చేసుకోవాలని కలెక్టర్ కోరారు. ఈ కార్యక్రమంలో కె ఆర్ ఆర్ సి ఎస్డిసి పి నీలకంఠేశ్వరరెడ్డి, గుడివాడ ఆర్డీవో జి బాలసుబ్రమణ్యం, మున్సిపల్ కమిషనర్ మనోహర్ రావు, డీపీఓ ఎం ధనలక్ష్మి, డీఎస్పీ పాల శ్రీనివాసరావుతో పాటు పలు విభాగాల డివిజన్ మరియు మండల స్థాయి అధికారులు పెద్దఎత్తున పాల్గొన్నారు. క్షేత్రస్థాయిలో సమస్యలను త్వరితగతిన పరిష్కరించేందుకు అధికారులు బాధ్యతాయుతంగా వ్యవహరించాలని జిల్లా యంత్రాంగం గట్టి సంకల్పంతో ముందుకు వెళ్తోంది.
Slug: gudivada-meekosam-grievance-program-collector-dk-balaji