జన గళం ఆంధ్రప్రదేశ్ డెస్క్: తిరుమల శ్రీ వేంకటేశ్వర స్వామి వారి రూ.300 ప్రత్యేక ప్రవేశ దర్శనం టికెట్ల కేటాయింపు, టీటీడీ అధికారిక వెబ్సైట్ నిర్వహణ తీరుపై భక్తులలో తీవ్ర ఆగ్రహావేశాలు వ్యక్తమవుతున్నాయి. ప్రతి నెలా టికెట్ల కోటా విడుదలైన కొద్ది నిమిషాల్లోనే సైట్ మొరాయించడం, సామాన్య భక్తులకు కనీస దర్శన భాగ్యం దక్కకపోవడం వెనుక పెద్ద ఎత్తున సాంకేతిక గోల్మాల్, టికెట్ల దందా సాగుతోందన్న బలమైన అనుమానాలు వ్యక్తమవుతున్నాయి. దీనిపై సీనియర్ పాత్రికేయులు శ్రీ సతీష్ కొట్టూరి సోషల్ మీడియా వేదికగా సంధించిన సూటి ప్రశ్నలు ప్రస్తుతం రాష్ట్రవ్యాప్తంగా పెను దుమారం రేపుతున్నాయి.
రోజూ 3 లక్షల తత్కాల్ టికెట్లను ఎలాంటి ప్రధాన లోపాలు లేకుండా జారీ చేస్తున్న రైల్వే (IRCTC) వ్యవస్థతో పోల్చితే, నెలకు కేవలం 3 లక్షల టికెట్లు ఇచ్చేందుకు వేల కోట్ల ఆదాయం కలిగిన టీటీడీ ఇంత నాసిరకం వెబ్సైట్ను ఎందుకు నిర్వహిస్తోందని సతీష్ కొట్టూరి నిలదీశారు. టికెట్ల ప్రక్రియ మొదలైన వెంటనే 7 నుండి 8 నిమిషాల నిడివితో చూపే “వర్చువల్ క్యూ” వెనుక అతిపెద్ద మోసం దాగి ఉందని, సామాన్య భక్తులు క్యూలో వేచి చూసేలోపే నిమిషాల వ్యవధిలో లక్షకు పైగా టికెట్లు ఎలా బుక్ అయిపోతున్నాయని ఆయన ప్రశ్నించారు. ఏజెంట్లు, దళారులకు అనుకూలంగా సిస్టమ్ను హ్యాక్ చేస్తున్నారా లేక టికెట్లను దొడ్డిదారిన బ్లాక్ చేస్తున్నారా అనే సందేహాలు తలెత్తుతున్నాయన్నారు. ఆధార్ ఆధారిత యూజర్ లాగిన్, వివరాలు ఆటో సేవ్ అయ్యే సదుపాయం కూడా కల్పించకుండా భక్తుల మనోభావాలతో ఆటలాడుతున్నారని ఆవేదన వ్యక్తం చేశారు. వీఐపీలకు ఇచ్చే ప్రాధాన్యత సామాన్య భక్తులకు ఇవ్వడం లేదని, హుండీ నింపే సామాన్యులను తిరుమలకు రాకుండా అడ్డుకునేలా ఉన్న ఈ దారుణ వ్యవస్థపై టీటీడీ ఉన్నతాధికారులు తక్షణమే విచారణ జరిపి సరిదిద్దాలని డిమాండ్ చేశారు.
