జన గళం ఆంధ్రప్రదేశ్ డెస్క్: కైకలూరు నియోజకవర్గంలో గ్రామీణ ప్రాంతాల అభివృద్ధిని మరింత వేగవంతం చేసే దిశగా కూటమి ప్రభుత్వం ప్రత్యేక చర్యలు చేపడుతోంది. ఇందులో భాగంగా ‘పల్లె పండుగ 3.0’ కార్యక్రమంలో భాగంగా కైకలూరు మండలం ఆచవరం గ్రామంలో నూతన సిమెంట్ (సీసీ) రోడ్డు నిర్మాణ పనులకు అట్టహాసంగా భూమిపూజ నిర్వహించారు. ఈ కార్యక్రమానికి కైకలూరు శాసనసభ్యులు, మాజీ మంత్రి, ప్రభుత్వ అస్యూరెన్స్ కమిటీ చైర్మన్ డాక్టర్ కామినేని శ్రీనివాస్ గారు ముఖ్య అతిథిగా విచ్చేసి పూజా కార్యక్రమాలు నిర్వహించి శంకుస్థాపన చేశారు.
ఈ భూమిపూజ కార్యక్రమంలో ఎక్స్ ఎమ్మెల్సీ కమ్మిలి విఠల్ గారు, తెలుగుదేశం పార్టీ నాయకులు, జాతీయ బీసీ సంక్షేమ సంఘం రాష్ట్ర ప్రధాన కార్యదర్శి బూరుబోయిన శ్రీనివాసరావు (బీఎస్ఆర్) గారు, ఎన్డీఏ (NDA) కూటమి నాయకులు, కార్యకర్తలు మరియు గ్రామ ప్రజలు పెద్ద సంఖ్యలో ఉత్సాహంగా పాల్గొన్నారు. గ్రామీణ ప్రాంతాల్లో మౌలిక వసతుల కల్పనకు ప్రభుత్వం అత్యంత ప్రాధాన్యత ఇస్తోందని, ప్రతి గ్రామాన్ని అన్ని రంగాల్లో అభివృద్ధి చేయడమే లక్ష్యంగా ముందుకు సాగుతున్నామని నాయకులు ఈ సందర్భంగా పేర్కొన్నారు. కేటాయించిన నిధులతో పనులను నాణ్యతా ప్రమాణాలతో వేగంగా పూర్తి చేసి స్థానిక ప్రజలకు అందుబాటులోకి తీసుకురావాలని అధికారులను ఆదేశించారు.
ఆచవరం గ్రామంలో సీసీ రోడ్డు నిర్మాణ పనులకు శంకుస్థాపన చేయడం పట్ల గ్రామస్తులు, స్థానిక ప్రజలు హర్షం వ్యక్తం చేశారు. రవాణా సౌకర్యం మెరుగుపడటంతో గ్రామ రూపురేఖలు మారుతాయని ఆనందం వెలిబుచ్చారు. ఈ కార్యక్రమంలో పాల్గొన్న ప్రజాప్రతినిధులు, కూటమి నాయకులకు గ్రామ ప్రజలు ఘన స్వాగతం పలికి కృతజ్ఞతలు తెలిపారు. గ్రామ అభివృద్ధికి ప్రభుత్వం నుంచి పూర్తి సహకారం ఉంటుందని నేతలు భరోసా కల్పించారు.
Slug: kaikaluru-mandal-achavaram-palle-panduga-cc-road-kamineni-srinivas