జన గళం ఆధ్యాత్మిక డెస్క్: విజయవాడ ఇంద్రకీలాద్రిపై జరుగుతున్న శరన్నవరాత్రి ఉత్సవాలలో సామాన్య భక్తులకు తీవ్ర నిరాశ, ఇబ్బందులు ఎదురవుతున్నాయి. అమ్మవారి దర్శనానికి విచ్చేసిన వృద్ధులు, మహిళలు మరియు అనారోగ్యంతో బాధపడుతున్న భక్తులు క్యూలైన్లలో పడుతున్న అగచాట్లు వర్ణనాతీతంగా మారాయి. ఉదయం ఐదు గంటలకే క్యూలైన్లలోకి ప్రవేశించినప్పటికీ, ఉదయం తొమ్మిది గంటల వరకు కూడా ఘాట్ రోడ్డుకు చేరుకోలేకపోయామని భక్తులు తీవ్ర ఆవేదన వ్యక్తం చేస్తున్నారు. సుమారు నాలుగు గంటలకు పైగా క్యూలైన్లలోనే వేచి ఉండాల్సి వస్తోందని వారు వాపోతున్నారు.
విశాఖపట్నం జిల్లా పెందుర్తి ప్రాంతం నుంచి దుర్గమ్మ దర్శనం కోసం ఇంద్రకీలాద్రికి తరలివచ్చిన భక్తులు పోలీసుల తీరుపై, అధికారుల నిర్వహణ లోపాలపై తీవ్ర ఆగ్రహం వ్యక్తం చేశారు. సాధారణ భక్తుల పట్ల ఎలాంటి కనికరం చూపకుండా, వీఐపీలకు మాత్రం పెద్దపీట వేస్తున్నారని వారు మండిపడ్డారు. గంటల తరబడి లైన్లలో నిలబడుతున్న వృద్ధులు, చిన్నారులకు కనీసం పాలు, మజ్జిగ, బిస్కెట్లు వంటి ఆహార పదార్థాలు అందించకపోవడం పట్ల విమర్శలు వెల్లువెత్తుతున్నాయి. కేవలం మంచినీటి వసతి మినహా ఎలాంటి కనీస అల్పాహార సౌకర్యాలు కల్పించలేదని భక్తులు ఆరోపించారు.
ఉత్సవాల ఏర్పాట్లపై అధికార యంత్రాంగం చేస్తున్న ప్రకటనలు కేవలం మాటలకే పరిమితమయ్యాయని, క్షేత్రస్థాయిలో మాత్రం తీవ్ర నిర్లక్ష్యం తాండవిస్తోందని విమర్శలు వ్యక్తమవుతున్నాయి. ఇప్పటికైనా ఆలయ అధికారులు, పాలకులు స్పందించి క్యూలైన్లలో నిరీక్షిస్తున్న భక్తులకు అవసరమైన తాగునీరు, అల్పాహారం అందించాలని డిమాండ్ చేస్తున్నారు. సామాన్య భక్తులు ఎలాంటి ఇబ్బందులు పడకుండా శీఘ్రదర్శనానికి తగిన చర్యలు తీసుకోవాలని కోరుతున్నారు.
Slug: vijayawada-indrakeeladri-dasara-elderly-devotees-queue-struggles