ఏపీలో పశువుల అక్రమ రవాణా దందాపై తీవ్ర ఆందోళనలు

జన గళం క్రైమ్ డెస్క్: ఆంధ్రప్రదేశ్ రాష్ట్రవ్యాప్తంగా మూగజీవాల రవాణా మాటున జరుగుతున్న నిబంధనల ఉల్లంఘనలపై సర్వత్రా తీవ్ర ఆందోళన వ్యక్తమవుతోంది. వ్యవసాయంలో రైతుకు అండగా నిలిచే ఆవులు, ఎద్దులు, గేదెలను భారీ సంఖ్యలో నిబంధనలకు విరుద్ధంగా తరలిస్తున్న ఘటనలు తరచుగా వెలుగుచూస్తున్నాయి. ఇటీవల కాకినాడ జిల్లా గొల్లప్రోలు జాతీయ రహదారిపై అరవై ఎద్దులను రెండు వాహనాల్లో తరలిస్తుండగా పోలీసులు పట్టుకున్న పరిణామంతో పశువుల రవాణా దందాపై మరోసారి రాష్ట్రవ్యాప్తంగా విస్తృత స్థాయి చర్చ మొదలైంది. రవాణా పత్రాల ముసుగులో పరిమితికి మించి మూగజీవాలను ఇరుకు వాహనాల్లో హింసిస్తూ తరలిస్తున్నారనే ఆరోపణలు బలంగా వినిపిస్తున్నాయి.
​గతంలో వివిధ జిల్లాల్లో నమోదైన పశువుల రవాణా కేసులను విశ్లేషిస్తే ఈ దందా వెనుక ఒక పకడ్బందీ నెట్‌వర్క్ పనిచేస్తున్నట్లు స్పష్టమవుతోంది. కృష్ణా జిల్లా హనుమాన్ జంక్షన్, నూజివీడు మార్గాల నుంచి తెలంగాణ వైపు వందలాది పశువులు తరలుతున్నట్లు పలుమార్లు పట్టుబడిన కేసుల ద్వారా నిర్ధారణ అయింది. పల్నాడు జిల్లా చిలకలూరిపేటతో పాటు ఎన్టీఆర్ జిల్లా విస్సన్నపేట, నందిగామ, కోదాడ అంతర్రాష్ట్ర సరిహద్దుల గుండా కూడా భారీ సంఖ్యలో గేదెలు, ఆవుల తరలింపు యథేచ్ఛగా సాగుతున్నట్లు సమాచారం. తగినంత గాలి, వెలుతురు, కనీస నీటి సౌకర్యం కూడా లేకుండా మూగజీవాలను ఇబ్బంది పెడుతూ హైదరాబాద్, కేరళ వంటి ప్రాంతాలకు తరలిస్తున్నట్లు అధికారిక రికార్డుల ద్వారా తెలుస్తోంది.
​పశువులను ఒక ప్రాంతం నుంచి మరో ప్రాంతానికి తరలించే క్రమంలో కచ్చితంగా జంతు సంక్షేమ చట్టాలను పాటించాల్సి ఉన్నప్పటికీ క్షేత్రస్థాయిలో ఆ పరిస్థితులు కనిపించడం లేదు. అక్రమ రవాణాదారులపై కఠిన చర్యలు తీసుకోవడంతో పాటు కొనుగోలు కేంద్రం నుంచి తుది గమ్యస్థానం వరకు పక్కాగా దర్యాప్తు చేయాలని జంతు సంరక్షణ సంస్థలు కోరుతున్నాయి. తరచుగా పట్టుబడుతున్న వాహనాల యజమానులు, నకిలీ రవాణా పత్రాలు సృష్టిస్తున్న వారిపై క్రిమినల్ కేసులు నమోదు చేయాలని స్థానికులు పట్టుబడుతున్నారు. జంతు సంక్షేమ చట్టాలను కఠినంగా అమలు చేసి అక్రమ రవాణాదారుల ఆటకట్టించాలని ప్రజలు డిమాండ్ చేస్తున్నారు.