హైదరాబాద్, 2026 సెప్టెంబర్ 19, (జనగళం డెస్క్):
శాంతిభద్రతల పరిరక్షణలో బాధ్యతాయుతంగా వ్యవహరించాల్సిన ఓ హోంగార్డు నడిరోడ్డుపై ఒక మహిళ పట్ల కర్కశంగా, అమానుషంగా ప్రవర్తించిన దారుణ ఘటన నగరంలో తీవ్ర సంచలనం సృష్టించింది. మహిళను విచక్షణారహితంగా కొడుతూ, జుట్టు పట్టుకుని నేలపై ఈడ్చుకుపోయిన హోంగార్డు ఆనంద్పై ఉన్నతాధికారులు ఉక్కుపాదం మోపారు. అతడిని తక్షణమే సర్వీసు నుంచి శాశ్వతంగా డిస్మిస్ చేయడమే కాకుండా, క్రిమినల్ కేసు నమోదు చేసి అరెస్ట్ చేసి రిమాండ్కు తరలించారు.
వివరాలు ఇలా ఉన్నాయి, హైదరాబాద్ హఫీజ్పేట రైల్వే స్టేషన్ సమీపంలోని ఓ భవనం వద్ద నిలబడి ఉన్న గుర్తుతెలియని మహిళ వద్దకు హోంగార్డు ఆనంద్ వచ్చాడు. ఎటువంటి ముందస్తు కారణం లేకుండానే ఆమెతో దురుసుగా ప్రవర్తించి తీవ్రస్థాయిలో కొట్టడం ప్రారంభించాడు. అంతటితో ఆగకుండా బాధితురాలి జుట్టు పట్టుకుని బలవంతంగా లాగుతూ, రోడ్డుపై దారుణంగా ఈడ్చుకెళ్లాడు. ఈ అమానుష దృశ్యాలను అక్కడున్న స్థానికులు తమ సెల్ఫోన్లలో బంధించి సోషల్ మీడియాలో పోస్ట్ చేయడంతో ఆ వీడియోలు క్షణాల్లో వైరల్గా మారాయి. రక్షించాల్సిన రక్షకభట వ్యవస్థలోనే ఉన్న వ్యక్తి ఇలా మృగంలా ప్రవర్తించడంపై సర్వత్రా తీవ్రస్థాయిలో ఆగ్రహజ్వాలలు వ్యక్తమయ్యాయి.
ఉన్నతాధికారుల సీరియస్ – కఠిన చర్యలు:
ఈ వీడియో దృశ్యాలు పోలీసు ఉన్నతాధికారుల దృష్టికి చేరడంతో వారు తీవ్ర విస్మయం చెందారు. మహిళలపై దాడులకు పాల్పడేవారిపై ఎట్టి పరిస్థితుల్లోనూ ఉపేక్షించేది లేదని స్పష్టం చేస్తూ తక్షణ విచారణకు ఆదేశించారు. నిందితుడు హోంగార్డు ఆనంద్గా గుర్తించిన వెంటనే అతనిపై సంబంధిత సెక్షన్ల కింద కేసు నమోదు చేశారు. క్రమశిక్షణా చర్యల్లో భాగంగా అతడిని హోంగార్డు విధుల నుంచి శాశ్వతంగా డిస్మిస్ చేస్తూ ఉత్తర్వులు జారీ చేశారు. అనంతరం ఆనంద్ను అరెస్టు చేసి కోర్టులో హాజరుపరచగా, న్యాయమూర్తి ఆదేశాల మేరకు రిమాండ్కు తరలించారు. చట్టాన్ని చేతుల్లోకి తీసుకుని మహిళలను వేధించే, దాడి చేసే అధికారులు, సిబ్బంది ఎవరైనా సరే చట్టపరంగా కఠిన శిక్షలు ఎదుర్కోక తప్పదని పోలీసు శాఖ ఈ సందర్భంగా హెచ్చరించింది.