జన గళం క్రైమ్ డెస్క్: హైదరాబాద్‌లోని శంషాబాద్ రాజీవ్ గాంధీ అంతర్జాతీయ విమానాశ్రయం (RGIA)లో అక్రమంగా తరలిస్తున్న విదేశీ బంగారాన్ని డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు విజయవంతంగా స్వాధీనం చేసుకున్నారు. అందిన పక్కా సమాచారంతో రంగంలోకి దిగిన అధికారులు తిరుచిరాపల్లి నుంచి హైదరాబాద్‌కు వచ్చిన ఓ ప్రయాణికుడిని తనిఖీ చేయగా ఈ అక్రమ రవాణా బాగోటం బట్టబయలైంది. పట్టుబడిన బంగారం బరువు సుమారు 1,481.780 గ్రాములు ఉండగా, దీని మార్కెట్ విలువ సుమారు 2.25 కోట్ల రూపాయలు ఉంటుందని అధికారులు అంచనా వేశారు.
నిందితుడు కస్టమ్స్ అధికారుల తనిఖీల నుంచి తప్పించుకునేందుకు అత్యంత చాకచక్యంగా ప్లాన్ వేసినట్లు దర్యాప్తులో వెల్లడైంది. విదేశీ ప్రయాణ దశలో విమానంలోనే బంగారాన్ని భద్రపరుచుకుని, ఆ తర్వాత హైదరాబాద్‌కు వెళ్లే దేశీయ ప్రయాణ (Domestic Leg) సమయంలో దాన్ని సులభంగా బయటకు తీసుకెళ్లేందుకు ప్రయత్నించాడు. దుస్తుల కింద ప్రత్యేకంగా కుట్టించుకున్న పౌచ్‌లో ఈ బంగారాన్ని ఉంచి, తనిఖీల్లో స్కానర్లకు చిక్కకుండా బ్లూ టేప్ మరియు కార్బన్ పేపర్‌తో పకడ్బందీగా చుట్టి తరలిస్తున్నట్లు గుర్తించారు. విమానంలో దాచిన బంగారాన్ని తానే స్వయంగా తీసుకున్నట్లు ప్రయాణికుడు విచారణలో అంగీకరించినట్లు అధికారులు తెలిపారు.
ఈ ఘటనపై కస్టమ్స్ చట్టం, 1962 (Customs Act, 1962) కింద కేసు నమోదు చేసిన డీఆర్‌ఐ అధికారులు, అక్రమంగా బంగారాన్ని తరలిస్తున్న ప్రయాణికుడిని అక్టోబర్ 6న అరెస్ట్ చేశారు. ఈ బంగారాన్ని ఎవరికి చేరవేయాలని భావించారు? దీని వెనుక అంతర్జాతీయ స్మగ్లింగ్ సిండికేట్ లేదా ఇతర వ్యక్తుల ప్రమేయం ఏమైనా ఉందా అనే కోణంలో అధికారులు దర్యాప్తును మరింత ముమ్మరం చేశారు. విమానాశ్రయాల్లో నిఘాను కట్టుదిట్టం చేయడంతోనే ఇలాంటి అక్రమ రవాణా మూలాలు గుట్టురట్టవుతున్నాయని అధికారులు పేర్కొన్నారు.
Slug: hyderabad-rgia-airport-gold-seized-dri-2-crores