జన గళం ఆంధ్రప్రదేశ్ డెస్క్: కృష్ణా జిల్లాలో దివ్యాంగ విద్యార్థుల విద్యాభివృద్ధి మరియు సహిత విద్యను మరింత బలోపేతం చేసే లక్ష్యంతో సమగ్ర శిక్ష ఆధ్వర్యంలో మచిలీపట్నంలో ఒకరోజు జిల్లా స్థాయి ఓరియంటేషన్ కార్యక్రమం గురువారం ఘనంగా నిర్వహించారు. మచిలీపట్నంలోని కృష్ణవేణి ఐటీఐ కళాశాలలో జరిగిన ఈ కార్యక్రమానికి జిల్లా విద్యాశాఖ అధికారి (DEO) యు.వి. సుబ్బారావు ముఖ్య అతిథిగా విచ్చేశారు. ఈ సదస్సులో జిల్లాలోని మండల విద్యాశాఖాధికారులు (MEO-I & II), సహిత విద్యా రిసోర్స్ పర్సన్లు (IERPs), ఉపాధ్యాయులు మరియు సమాంతర విభాగాల అధికారులు పెద్ద సంఖ్యలో పాల్గొని పలు కీలక అంశాలపై చర్చించారు.
ఈ సందర్భంగా డీఈఓ యు.వి. సుబ్బారావు మాట్లాడుతూ మండల విద్యాశాఖాధికారులు, సహిత విద్య ఉపాధ్యాయులు సమన్వయంతో వ్యవహరించి దివ్యాంగ విద్యార్థుల తల్లిదండ్రులలో అవగాహన, చైతన్యం కల్పించాలని సూచించారు. ప్రభుత్వం అందిస్తున్న సదుపాయాలు, పథకాలు అర్హులైన ప్రతి విద్యార్థికి పూర్తిస్థాయిలో అందేలా చూడాలని స్పష్టం చేశారు. ఈ కార్యక్రమంలో సీసీహెచ్ డాక్టర్ శేషుకుమార్ దివ్యాంగ విద్యార్థులకు సంబంధించిన యూడీఐడీ (UDID) కార్డుల ప్రాధాన్యత మరియు వాటి వినియోగం గురించి సమగ్రంగా వివరించారు. సమగ్ర శిక్ష కృష్ణా జిల్లా ఐఈ కోఆర్డినేటర్ కళ్ళేపల్లి ఏడుకొండలు మాట్లాడుతూ ప్రత్యేక అవసరాలు గల పిల్లల కోసం ప్రభుత్వం అందిస్తున్న అలవెన్సులు, సదుపాయాలను ప్రతి ఒక్కరూ వినియోగించుకోవాలని కోరారు. అంతేకాకుండా జిల్లాలో కొత్తగా ఐదు ఆటిజం కేంద్రాలను ఏర్పాటు చేయనున్నట్లు ఆయన వెల్లడించారు. ఈ కార్యక్రమంలో మచిలీపట్నం డివైఈఓ బి.ఎస్.సి. శేఖర్ సింగ్, గుడివాడ డివైఈఓ రవికుమార్, స్కూల్ అసిస్టెంట్ స్పెషల్ ఎడ్యుకేషన్ టీచర్ నాగ శివాజీ, ఐఈఆర్పీలు హమీద్, స్వాతి తదితరులు పాల్గొన్నారు.
ఓరియంటేషన్ కార్యక్రమం అనంతరం జిల్లా విద్యాశాఖ అధికారి యు.వి. సుబ్బారావు మచిలీపట్నంలోని ఎం.పి.పి.ఎస్. పాములగూడెం పాఠశాలను ఆకస్మికంగా సందర్శించి మధ్యాహ్న భోజన పథకం (MDM) అమలు తీరును పరిశీలించారు. పాఠశాలలో విద్యార్థుల అభ్యసన సామర్థ్యాలు, నోట్‌బుక్‌ల దిద్దుబాట్లు, పాఠశాల పరిశుభ్రత మరియు పారిశుధ్య నిర్వహణను క్షుణ్ణంగా తనిఖీ చేశారు. విద్యార్థుల అభ్యసన ఫలితాలను మెరుగుపరిచేందుకు ఉపాధ్యాయులు ప్రత్యేక శ్రద్ధ వహించాలని, పాఠశాల పరిసరాలను ఎల్లప్పుడూ పరిశుభ్రంగా ఉంచుకోవాలని సూచించారు.
Slug: machilipatnam-inclusive-education-orientation-deo-subba-rao