జన గళం ఆంధ్రప్రదేశ్ డెస్క్: ఆంధ్రప్రదేశ్ రాష్ట్రంలో వెనుకబడిన తరగతుల (బీసీ) హక్కులను కాలరాస్తూ, రిజర్వేషన్ల అంశంలో వైఎస్సార్‌సీపీ పచ్చి ద్వంద్వ వైఖరి ప్రదర్శిస్తోందని రాష్ట్ర గృహ నిర్మాణ మరియు సమాచార పౌర సంబంధాల శాఖ మంత్రి కొలుసు పార్థసారథి తీవ్రస్థాయిలో మండిపడ్డారు. బీసీ రిజర్వేషన్లు యాభై శాతానికి మించి ఇవ్వకూడదంటూ కోర్టుల్లో అడ్డగోలు వాదనలు చేయిస్తూ ఆ పార్టీ బీసీల రిజర్వేషన్లకు గండికొడుతోందని ఆయన విమర్శించారు. సమాజంలో వెనుకబడిన వర్గాల అభ్యున్నతికి వ్యతిరేకంగా వైఎస్సార్‌సీపీ నాయకులు చేస్తున్న కుట్రలను ప్రజలు గమనిస్తున్నారని ఆయన స్పష్టం చేశారు.
తెలుగుదేశం పార్టీ వ్యవస్థాపకులు స్వర్గీయ నందమూరి తారక రామారావు నాడే బీసీలకు ప్రత్యేక రిజర్వేషన్లు కల్పించి వారికి రాజకీయంగా సముచిత గుర్తింపు తెచ్చారని మంత్రి కొలుసు పార్థసారథి గుర్తుచేశారు. ఆనాడు ఎన్టీఆర్ ఇరవై నాలుగు శాతం ఇచ్చిన బీసీ రిజర్వేషన్లను ముఖ్యమంత్రి నారా చంద్రబాబు నాయుడు ముప్పై నాలుగు శాతానికి పెంచి బీసీలను అన్ని రంగాల్లో ప్రోత్సహించారని పేర్కొన్నారు. అయితే గత ఐదేళ్ల వైఎస్సార్‌సీపీ పాలనలో బీసీల రిజర్వేషన్లను దారుణంగా ఇరవై నాలుగు శాతానికి కుదించి, వేలాది రాజకీయ పదవులకు బీసీలను వైఎస్ జగన్ మోహన్ రెడ్డి దూరం చేశారని తీవ్ర ఆగ్రహం వ్యక్తం చేశారు.
ప్రస్తుతం కూటమి ప్రభుత్వ పాలనలో బీసీల రిజర్వేషన్లను తిరిగి ముప్పై నాలుగు శాతానికి పెంచి ముందుకు వెళ్తుంటే, ఓర్వలేక వైఎస్సార్‌సీపీ నేతలు మళ్లీ కుట్రపూరిత అడ్డంకులు సృష్టిస్తున్నారని మంత్రి దుయ్యబట్టారు. రాష్ట్రంలో బీసీల ఆత్మగౌరవాన్ని, వారి రాజకీయ భవిష్యత్తును కూటమి ప్రభుత్వం ఎప్పటికీ కంటికి రెప్పలా కాపాడుతుందని ఆయన స్పష్టం చేశారు. స్థానిక సంస్థల ఎన్నికల్లో బీసీలకు తగిన ప్రాధాన్యత కల్పిస్తూ ముందుకు సాగుతున్న ప్రభుత్వానికి వ్యతిరేకంగా కుట్రలు పన్నే శక్తులకు ప్రజలే తగిన బుద్ధి చెబుతారని హెచ్చరించారు.
Slug: minister-kolusu-parthasarathy-slams-ysrcp-over-bc-reservations-and-local-body-elections