జన గళం ఆంధ్రప్రదేశ్ డెస్క్: కృష్ణా జిల్లా పమిడిముక్కల మండల ప్రజాప్రతినిధుల ఐదేళ్ల పదవీ కాలం విజయవంతంగా ముగిసిన సందర్భంగా మండల పరిషత్ కార్యాలయంలో వీడ్కోలు మరియు సన్మాన సభ ఘనంగా జరిగింది. ఎంపీడీవో వి. సీతారామరాజు ఆధ్వర్యంలో మండల పరిషత్ అధికారులు, సిబ్బంది స్థానిక ఎంపీపీ, జడ్పీటీసీ, వైస్ ఎంపీపీ, ఎంపీటీసీ సభ్యులను ఘనంగా సత్కరించి జ్ఞాపికలను అందజేశారు. అలాగే మండల పార్టీ అధ్యక్షులు ఎలమంచిలి గణేష్ ఆధ్వర్యంలో ప్రజాప్రతినిధులకు పూలమాలలు వేసి, శాలువాలు కప్పి ఆత్మీయంగా అభినందనలు తెలియజేశారు.
ఈ సందర్భంగా ఎంపీపీ కాసాని వేద సుప్రజా మాట్లాడుతూ తమ ఐదేళ్ల పాలనా కాలంలో సుమారు 5 కోట్ల 50 లక్షల రూపాయల ప్రత్యేక గ్రాంట్ నిధులతో మండల పరిధిలో పలు అభివృద్ధి పనులను దిగ్విజయంగా పూర్తి చేశామని వెల్లడించారు. రాజకీయ పార్టీలు, కులాలకు అతీతంగా కేవలం అభివృద్ధిని మాత్రమే ధ్యేయంగా పెట్టుకుని ప్రజలకు సేవలందించడం ఎంతో సంతృప్తిని ఇచ్చిందని పేర్కొన్నారు. అనంతరం జడ్పీటీసీ సభ్యురాలు యేనుగ వెంకటరమణ కుమారి మాట్లాడుతూ పాలకవర్గ సభ్యులంతా సమన్వయంతో పనిచేస్తూ గ్రామాల అభివృద్ధికి తమ వంతుగా పెద్ద ఎత్తున నిధులు తీసుకువచ్చి అభివృద్ధి చేశామని తెలిపారు.
వైస్ ఎంపీపీ కొడమంచిలి మహేష్ మాట్లాడుతూ గతంలో ఎన్నడూ లేని రీతిలో మండలంలో కనీవినీ ఎరుగని అభివృద్ధి పనులు చేపట్టామని వివరించారు. ముఖ్యంగా పల్లెల్లో డ్రైనేజీ వ్యవస్థ మెరుగుపరచడం, సబ్-మెర్సిబుల్ బోర్లు, తాగునీటి చేతిపంపులు ఏర్పాటు చేయడంతో పాటు ప్రభుత్వ పాఠశాల భవనాలు, అంతర్గత సీసీ రోడ్లు, మెటల్ రోడ్ల నిర్మాణం మరియు శ్మశాన వాటికల అభివృద్ధి పనులను విజయవంతంగా పూర్తి చేశామని తెలిపారు. తమ పదవీ కాలంలో మండలాన్ని ప్రగతిపథంలో నడిపించేందుకు సంపూర్ణంగా సహకరించిన మండల ప్రజలకు, నాయకులకు, కార్యకర్తలకు ఆయన హృదయపూర్వక ధన్యవాదాలు తెలియజేశారు.
ఈ కార్యక్రమంలో డిప్యూటీ ఎంపీడీవో తావీర్య, ఏవో గోలి రామకృష్ణ, మండల కో-ఆప్షన్ సభ్యులు మీర్జా దియానత్ అలీ, నాయకులు ఏనుగ మస్తాన్రావు, కాసాని శ్రీనివాసరావు, పోలిమెట్ల వంశీకృష్ణ, గొర్కిపూడి బుజ్జి, కొనతం శివరామకృష్ణ, తిరుమలశెట్టి బోసు బాబు, బొల్లా సాంబశివరావు, కోట మణిరాజ్ లతో పాటు పలువురు ప్రజాప్రతినిధులు, అధికారులు, గ్రామ ప్రముఖులు పెద్ద సంఖ్యలో పాల్గొన్నారు.
Slug: pamidimukkala-mandal-parishad-representatives-felicitation-ceremony