జన గళం ఆంధ్రప్రదేశ్ డెస్క్: అభివృద్ధి విషయంలో ప్రాంతం లేదా పార్టీ అనే తేడా ఉండకూడదని, ప్రజల సంక్షేమమే కూటమి ప్రభుత్వానికి అత్యున్నత ప్రాధాన్యమని రాష్ట్ర ఉప ముఖ్యమంత్రి పవన్ కళ్యాణ్ స్పష్టం చేశారు. కడప జిల్లా ప్రొద్దుటూరులో సోమవారం ముఖ్యమంత్రి నారా చంద్రబాబు నాయుడుతో కలిసి ‘జల్ జీవన్ మిషన్ – అమరజీవి జలధార’ ప్రాజెక్టుల శంకుస్థాపన కార్యక్రమంలో ఆయన పాల్గొన్నారు. ఈ సందర్భంగా ఏర్పాటు చేసిన బహిరంగ సభలో పవన్ కళ్యాణ్ మాట్లాడుతూ ప్రతి ఇంటికీ సురక్షితమైన తాగునీరు, ప్రతి గ్రామానికి నీటి భద్రత కల్పించడమే ఈ బృహత్తర కార్యక్రమ లక్ష్యమని ఉద్ఘాటించారు. తాగునీటి సరఫరా వంటి ప్రాథమిక అంశాల్లో ఎటువంటి రాజకీయాలకు తావులేదని తేల్చిచెప్పారు.
రాష్ట్రంలో తాగునీటి సమస్యకు శాశ్వత పరిష్కారం చూపేందుకు సుమారు ముప్పై వేల నూట యాభై ఆరు కోట్ల రూపాయల భారీ వ్యయంతో 50,315 పనులకు శ్రీకారం చుట్టినట్లు పవన్ కళ్యాణ్ వెల్లడించారు. దీనిద్వారా రాష్ట్రవ్యాప్తంగా సుమారు 3.27 కోట్ల మంది ప్రజలకు స్వచ్ఛమైన తాగునీరు అందనుందని తెలిపారు. గత ప్రభుత్వ హయాంలో కేంద్రం అందించిన ‘జల్ జీవన్ మిషన్’ నిధులను సద్వినియోగం చేసుకోలేదని విమర్శించారు. కూటమి ప్రభుత్వం అధికారంలోకి వచ్చిన వెంటనే ప్రధాని నరేంద్ర మోదీ మరియు కేంద్ర మంత్రుల సహకారంతో ఈ పథకం గడువును 2028 వరకు పొడిగించుకుని వేగంగా పనులు చేపడుతున్నామని, ఇప్పటికే రూ. 4,500 కోట్ల విలువైన పనులు పూర్తి చేశామని వివరించారు. గత ఏడు దశాబ్దాలలో జరిగిన అభివృద్ధి కంటే కేవలం ఈ ఐదేళ్లలోనే 50 నుంచి 175 శాతం అదనపు మౌలిక వసతుల సామర్థ్యాన్ని సృష్టిస్తున్నట్లు తెలిపారు.
రాయలసీమలోని కరువు ప్రభావిత ప్రాంతాలతో పాటు పులివెందులలో అసంపూర్తిగా ఉన్న తాగునీటి పథకానికి రూ. 280 కోట్లు కేటాయించి 299 గ్రామాల తాగునీటి సమస్యను పరిష్కరిస్తున్నట్లు తెలిపారు. ఉద్దానం నుంచి కుప్పం వరకు, ఫ్లోరైడ్ ప్రభావిత మార్కాపురం వరకు అన్ని ప్రాంతాలకూ సురక్షిత నీరు అందిస్తామన్నారు. నీటి నాణ్యత పరిరక్షణకు ప్రత్యేకంగా రూ. 1,600 కోట్లకు పైగా కేటాయించినట్లు తెలిపారు. ఇదే క్రమంలో ప్రొద్దుటూరు నియోజకవర్గంలోని తాళ్లమాపురం, సాగిలి గొడ్డుపల్లి, ములవారిపల్లి గ్రామాల్లో రూ. 3.5 కోట్ల వ్యయంతో సీసీ రోడ్లు, ఓవర్‌హెడ్ రిజర్వాయర్లు, పైప్‌లైన్ల నిర్మాణ పనులను వెంటనే చేపట్టాలని అధికారులను ఆదేశించారు. కాంట్రాక్టర్లకు ఎఫ్‌ఐఎఫ్‌వో విధానంలో బిల్లులు చెల్లిస్తూ ఆర్థిక భరోసా కల్పిస్తున్నామని, పంచాయతీలకు నిధుల కొరత లేకుండా చూస్తూ గ్రామీణ ఆర్థిక వ్యవస్థను బలోపేతం చేస్తున్నామని పవన్ కళ్యాణ్ పేర్కొన్నారు.
Slug: pawan-kalyan-speech-amarajeevi-jaladhara-proddatur-launch