జన గళం అమరావతి బ్యూరో: ముఖ్యమంత్రి నారా చంద్రబాబు నాయుడు అధ్యక్షతన అమరావతి సచివాలయంలో దాదాపు మూడు గంటల పాటు సుదీర్ఘంగా సాగిన ఆంధ్రప్రదేశ్ మంత్రివర్గ సమావేశం (ఏపీ కేబినెట్) ముగిసింది. రాష్ట్ర సర్వతోముఖాభివృద్ధి, విద్య, వైద్యం, సంక్షేమానికి సంబంధించి మొత్తం 12 కీలక అజెండా అంశాలకు మంత్రివర్గం ఏకగ్రీవ ఆమోదం తెలిపింది. ఈ సమావేశ నిర్ణయాలను సమాచార, పౌర సంబంధాల శాఖ మంత్రి కొలుసు పార్థసారథి మీడియాకు వెల్లడించారు. ప్రధానమంత్రి శ్రీ నరేంద్ర మోదీ ప్రజాసేవలో 25 సంవత్సరాల మైలురాయిని పూర్తి చేసుకున్న సందర్భంగా ఆయనకు అభినందనలు తెలుపుతూ కేబినెట్ ఏకగ్రీవ తీర్మానం చేసింది.
వైద్య రంగానికి పెద్దపీట వేస్తూ రేపల్లెలోని 30 పడకల కమ్యూనిటీ హెల్త్ సెంటర్ (సీహెచ్‌సీ)ని రూ.58.42 కోట్ల వ్యయంతో 100 పడకల ఏరియా ఆస్పత్రిగా అప్‌గ్రేడ్ చేయడంతో పాటు అదనంగా 66 పోస్టుల భర్తీకి ఆమోదముద్ర వేసింది. అలాగే రూ.20.62 కోట్లతో ఏపీహెచ్ఐఎంఎస్ ప్రాజెక్టును 72 నెలల పాటు అమలు చేయాలని నిర్ణయించారు. విద్యా రంగంలో సంస్కరణల దిశగా 2026-27 విద్యా సంవత్సరానికి సంబంధించి ‘తల్లికి వందనం’ మార్గదర్శకాలు, పరిపాలనా అనుమతులకు గ్రీన్ సిగ్నల్ ఇచ్చింది. సంక్షేమ హాస్టళ్లు, రెసిడెన్షియల్ పాఠశాలల్లో డైట్ ఛార్జీల పెంపు ఉత్తర్వులకు రాటిఫికేషన్ ఇచ్చారు. గిరిజన విద్యార్థుల ఉన్నత చదువుల కోసం విశాఖపట్నం మారికవలసలో ఇంటెన్సివ్ రెసిడెన్షియల్ కోచింగ్ సెంటర్ ఏర్పాటుకు ఆమోదం లభించింది. ఏపీ విద్యాచట్టం-1982కు సవరణలతో పాటు ప్రతిష్టాత్మక విదేశీ ఉన్నత విద్యాసంస్థలు, ప్రైవేట్ వర్సిటీల క్యాంపస్‌ల ఏర్పాటుకు నూతన పాలసీ-2026 కు, వాటికిచ్చే ప్రోత్సాహకాల సమగ్ర విధానానికి కేబినెట్ ఆమోదం పలికింది.
మరోవైపు పరిపాలనా, దేవాదాయ భూముల అంశాల్లో కీలక నిర్ణయాలు తీసుకున్నారు. కుప్పం అర్బన్ డెవలప్‌మెంట్ అథారిటీ అధికారుల అతిథిగృహం నిర్మాణం కోసం 1.69 ఎకరాల భూమి వర్గీకరణ మార్పునకు, ఎన్టీఆర్ జిల్లాలో ప్రభుత్వ పోరంబోకు భూఆక్రమణల క్రమబద్ధీకరణ ఉత్తర్వులకు రాటిఫికేషన్ ఇచ్చారు. వైఎస్సార్ కడప జిల్లా పాతూరులో ఆలయ సమగ్ర అభివృద్ధికి 7.66 ఎకరాల ప్రభుత్వ భూమిని దేవాదాయశాఖకు బదలాయించేందుకు, కొండపిలో బాలుర రెసిడెన్షియల్ స్కూల్, హాస్టల్ నిర్మాణం కోసం 7 ఎకరాల భూమి వర్గీకరణ మార్పునకు కేబినెట్ ఆమోదం తెలిపింది.
Slug: ap-cabinet-approves-12-key-agenda-items-thalliki-vandanam-guidelines-repalle-hospital-foreign-universities-policy