జన గళం ఆంధ్రప్రదేశ్ డెస్క్: ఆంధ్రప్రదేశ్‌లో స్థానిక సంస్థల ఎన్నికల నిర్వహణకు రాష్ట్ర ఎన్నికల సంఘం షెడ్యూల్ విడుదల చేసింది. రాష్ట్రవ్యాప్తంగా మొత్తం మూడు దశల్లో ఈ ఎన్నికలు నిర్వహించనున్నట్లు ప్రకటించారు. దీనిలో భాగంగా మొత్తం 100 అర్బన్ లోకల్ బాడీస్ (యూఎల్‌బీ) ఎన్నికలకు నోటిఫికేషన్ విడుదల అయింది. ఇందులో 10 పంచాయతీలు, 77 మున్సిపాలిటీలు, 13 కార్పొరేషన్లకు ఎన్నికలు జరగనున్నాయి.
ఎన్నికల షెడ్యూల్ వివరాల ప్రకారం, ఈ నెల 28వ తేదీన మున్సిపల్ ఎన్నికల పోలింగ్ నిర్వహించనుండగా, అక్టోబర్ 30న ఫలితాలు వెల్లడించనున్నారు. అలాగే నవంబర్ 3న ఎంపీటీసీ, జెడ్పీటీసీ స్థానాలకు పోలింగ్ జరగనుండగా, నవంబర్ 5న వాటి ఫలితాలు విడుదలవుతాయి. ఇక గ్రామ పంచాయతీ ఎన్నికలను మూడు దశల్లో నిర్వహించనున్నారు. నవంబర్ 26న తొలి దశ, నవంబర్ 29న రెండో దశ, మరియు డిసెంబర్ 2న మూడో దశ గ్రామ పంచాయతీ ఎన్నికల పోలింగ్ జరుగుతుంది. గ్రామ పంచాయతీ ఎన్నికలకు సంబంధించి పోలింగ్ జరిగిన నాడే ఫలితాలు వెల్లడించనున్నారు. ఎన్నికల షెడ్యూల్ విడుదల కావడంతో రాష్ట్రంలో రాజకీయ వాతావరణం ఒక్కసారిగా వేడెక్కింది