జన గళం ఆంధ్రప్రదేశ్ డెస్క్: కృష్ణా జిల్లా దివిసీమ ప్రాంతానికి చెందిన విశ్రాంత సైనిక వీరుడు, కరాటే రంగ ప్రముఖులు పుడమి కామేశ్వరరావు గిన్నిస్ బుక్ ఆఫ్ వరల్డ్ రికార్డు సాధించడం మొత్తం దివిసీమకే గర్వకారణమని అవనిగడ్డ శాసనసభ్యులు మండలి బుద్ధప్రసాద్ కొనియాడారు. కోడూరు మండలం మందపాకల గ్రామానికి చెందిన కామేశ్వరరావు గిన్నిస్ వరల్డ్ రికార్డు సర్టిఫికెట్ అందుకున్న అనంతరం సోమవారం అవనిగడ్డలో స్థానిక ఎమ్మెల్యేను మర్యాదపూర్వకంగా కలిశారు. ఈ సందర్భంగా ఎమ్మెల్యే మండలి బుద్ధప్రసాద్, నియోజకవర్గ యువ నాయకులు మండలి వెంకట్రామ్ ఆయనను శాలువాతో ఘనంగా సత్కరించి ప్రత్యేక అభినందనలు తెలియజేశారు.
హైదరాబాద్ నగరంలో విజన్ మార్షల్ ఆర్ట్స్ అకాడమీ, జేఆర్ ఇంటర్నేషనల్ తైక్వాండో అకాడమీ సంయుక్త ఆధ్వర్యంలో నిర్వహించిన భారీ కరాటే ప్రదర్శనలో కామేశ్వరరావుతో పాటు ఏకకాలంలో 1,212 మంది క్రీడాకారులు పాల్గొని ఈ అరుదైన గిన్నిస్ ప్రపంచ రికార్డును నెలకొల్పారు. చెన్నై బుడోకాయ్ మార్షల్ ఆర్ట్స్ శిక్షణ పాఠశాల వ్యవస్థాపకులు, ప్రపంచ ఛాంపియన్ డాక్టర్ ఆర్టీవీ మణి పర్యవేక్షణలో ఈ మహా ప్రదర్శనలో పాల్గొన్న కామేశ్వరరావు తాజాగా అధికారిక గిన్నిస్ రికార్డు ధ్రువపత్రాన్ని స్వీకరించారు. తాను సాధించిన ఈ అంతర్జాతీయ ఘనతను స్థానిక ప్రజాప్రతినిధులకు వివరించి వారి ఆశీస్సులు అందుకున్నారు.
ఈ సందర్భంగా ఎమ్మెల్యే మండలి బుద్ధప్రసాద్ మాట్లాడుతూ కామేశ్వరరావు గతంలో భారత సైన్యంలో విశిష్ట సేవలందించడమే కాకుండా, కార్గిల్ యుద్ధంలో పాల్గొన్న సాహస వీరుడని ప్రశంసించారు. అంతేకాకుండా ముఖ్యమంత్రి నారా చంద్రబాబు నాయుడు వద్ద ఎన్ఎస్జీ బ్లాక్ క్యాట్ కమాండోగా బాధ్యతలు నిర్వర్తించి మాతృభూమి రక్షణలో కీలక పాత్ర పోషించారని గుర్తుచేశారు. దేశ రక్షణతో పాటు యుద్ధ కళలైన కరాటేలో అంతర్జాతీయ స్థాయి గుర్తింపు సాధించి భావి తరాలకు ఆదర్శంగా నిలిచారని, ఆయన ప్రతిభ గ్రామీణ యువతకు స్ఫూర్తిదాయకమని పేర్కొన్నారు.