జన గళం మచిలీపట్నం డెస్క్: ఆంధ్రప్రదేశ్ స్థానిక సంస్థల (MPTC, ZPTC) ఎన్నికల సమరానికి సంబంధించి మచిలీపట్నం పార్లమెంట్ నియోజకవర్గ పరిధిలో జనసేన పార్టీ సమరశంఖం పూరించింది. మచిలీపట్నంలోని పార్టీ పార్లమెంట్ క్యాంపు కార్యాలయంలో కో-ఆర్డినేషన్ కమిటీ ఆధ్వర్యంలో కీలక సమీక్షా సమావేశం జరిగింది. ఈ భేటీలో గుడివాడ, గన్నవరం, పెనమలూరు, పామర్రు అసెంబ్లీ నియోజకవర్గాలకు చెందిన పార్లమెంట్, అసెంబ్లీ నియోజకవర్గ కో-ఆర్డినేషన్ కమిటీ సభ్యులు, స్థానిక నాయకులు, జనసైనికులు పెద్ద ఎత్తున పాల్గొన్నారు.
మచిలీపట్నం ఎంపీ శ్రీ వల్లభనేని బాలశౌరి గారి మార్గదర్శకత్వంలో నిర్వహించిన ఈ సమావేశంలో ఎంపీటీసీ, జెడ్పీటీసీ స్థానాల్లో కూటమి అభ్యర్థుల గెలుపు వ్యూహాలు, క్షేత్రస్థాయి సమన్వయం, ఓటర్లను చేరే కార్యాచరణపై విస్తృతంగా చర్చించారు. నాలుగు అసెంబ్లీ సెగ్మెంట్లలోని ప్రతి గ్రామంలో కూటమి సంక్షేమ పథకాలు, డిప్యూటీ సీఎం పవన్ కళ్యాణ్ గారి నాయకత్వంలో జరుగుతున్న గ్రామీణాభివృద్ధిని ప్రజల్లోకి తీసుకెళ్లాలని నిర్ణయించారు. స్థానిక ఎన్నికల్లో ఎన్డీయే కూటమికి తిరుగులేని ఆధిక్యం సాధించిపెట్టడమే లక్ష్యంగా నాయకులు, కార్యకర్తలు ఐక్యంగా, సమన్వయంతో పనిచేయాలని కో-ఆర్డినేషన్ కమిటీ పిలుపునిచ్చింది.
