జన గళం పెడన డెస్క్: కృష్ణా జిల్లా పెడన పురపాలక సంఘ ఎన్నికల సమరం క్షేత్రస్థాయిలో రసవత్తరంగా మారింది. ఎన్డీయే కూటమి (టీడీపీ – జనసేన – బీజేపీ) బలపరిచిన జనసేన పార్టీ అధికారిక అభ్యర్థుల తరఫున పెడన పట్టణంలో ముమ్మర ఎన్నికల ప్రచారం ఊపందుకుంది. పెడన పురపాలక సంఘ చైర్‌పర్సన్ అభ్యర్థిని శ్రీమతి బళ్ళ జ్ఞాన లింగ నాగ జ్యోత్స్న రాణి, శ్రీ బళ్ళ కోట గంగయ్య దంపతులతో కలిసి పెడన నియోజకవర్గ జనసేన పార్టీ సమన్వయకర్త శ్రీ లింగం నాగేశ్వరరావు గారు విస్తృతంగా ఎన్నికల ప్రచారంలో పాల్గొన్నారు. పట్టణంలోని పలు వార్డుల్లో నాయకులు, కార్యకర్తలతో కలిసి ఇంటింటికీ తిరుగుతూ స్థానిక ప్రజలను నేరుగా కలుసుకుని మద్దతు కోరారు.
ఈ సందర్భంగా ప్రతి గడప వద్ద ఓటర్లు నాయకులకు హారతులు పట్టి ఘన స్వాగతం పలికారు. పెడన నియోజకవర్గ సమన్వయకర్త లింగం నాగేశ్వరరావు గారు మాట్లాడుతూ.. ఆంధ్రప్రదేశ్ ఉప ముఖ్యమంత్రి, జనసేనాని శ్రీ పవన్ కళ్యాణ్ గారి ఆశయాలకు అనుగుణంగా, కూటమి ప్రభుత్వ ప్రగతి ప్రణాళికలతో చేనేత నగరమైన పెడనను అన్ని రంగాల్లో ఆదర్శవంతంగా తీర్చిదిద్దే బాధ్యతను జనసేన తీసుకుంటుందని స్పష్టం చేశారు. చేనేత వర్గానికి చెందిన బళ్ళ జ్ఞాన లింగ నాగ జ్యోత్స్న రాణి గారిని చైర్‌పర్సన్‌గా ఎన్నుకుంటే బడుగు, బలహీన వర్గాల సమస్యలు పరిష్కారం కావడంతో పాటు పట్టణంలో తాగునీరు, డ్రైనేజీ, రోడ్లు వంటి మౌలిక సదుపాయాలు వేగంగా అభివృద్ధి చెందుతాయని పేర్కొన్నారు.
అధికారిక ఎన్నికల గుర్తు అయిన ‘గాజు గ్లాస్’ గుర్తుపై ఓటు వేసి చైర్‌పర్సన్ అభ్యర్థినితో పాటు కౌన్సిలర్ అభ్యర్థులందరినీ భారీ మెజారిటీతో గెలిపించాలని ఆయన ఓటర్లను అభ్యర్థించారు. ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్, మంత్రి నాదెండ్ల మనోహర్ గార్ల నాయకత్వంలో, మచిలీపట్నం పార్లమెంట్ సభ్యులు వల్లభనేని బాలశౌరి, పార్టీ రాష్ట్ర ప్రధాన కార్యదర్శి రామ్ తాళ్లూరి సహకారంతో పెడన ప్రగతి రథం పరుగులు తీస్తుందని ధీమా వ్యక్తం చేశారు. ఈ కార్యక్రమంలో కూటమి పార్టీల వార్డు సమన్వయకర్తలు, జనసైనికులు, వీర మహిళలు, తెలుగుదేశం-బీజేపీ శ్రేణులు పెద్ద సంఖ్యలో పాల్గొన్నారు.