జన గళం డెస్క్: స్థానిక సంస్థల ఎన్నికల వేళ సీట్లు దక్కక నిరాశకు గురైన నిజమైన కార్యకర్తలకు, అంతర్గత కుట్రల వల్ల నష్టపోయిన నిబద్ధత గల నాయకులకు పార్టీ వర్గాల నుంచి బలమైన నైతిక మద్దతు లభిస్తోంది. “ప్రయత్నించు.. ప్రయాణం ఖచ్చితంగా మారుతుంది” అనే నినాదంతో క్షేత్రస్థాయి నాయకుల్లో ఆత్మవిశ్వాసాన్ని నింపే ప్రయత్నం జరుగుతోంది. ప్రస్తుత రాజకీయాల్లో కొందరు స్వార్థపరులు చేస్తున్న కుళ్ళు రాజకీయాలు, గ్రూపు తగాదాలు, వెన్నుపోటు చర్యలు తాత్కాలికంగా ఇబ్బంది కలిగించినా.. నిజాయితీగా ప్రజాసేవ చేసే వారి భవిష్యత్తు ఎప్పటికీ చీకటిమయం కాదని శ్రేణులు స్పష్టం చేస్తున్నాయి.
పార్టీని అడ్డం పెట్టుకుని పదవుల కోసం పాకులాడే కుట్రదారులు ఎప్పటికీ చరిత్రలో నిలబడలేరని, ప్రజల పక్షాన పోరాడే నిజమైన నాయకులకు ప్రజల గుండెల్లో శాశ్వత స్థానం ఉంటుందని కేడర్ పేర్కొంటోంది. అన్యాయంపై న్యాయం, చెడుపై మంచి సాధించిన విజయానికి ప్రతీకగా నిలిచే దుర్గామాత స్ఫూర్తితో.. ప్రతి కార్యకర్త నిరుత్సాహపడకుండా ముందడుగు వేయాలని పిలుపునిచ్చారు. నేడు పదవులు రాలేదని ఆగిపోకుండా ప్రజాసేవలో కొనసాగితే, రాబోయే రోజుల్లో అధినాయకత్వం తప్పక గుర్తించి తగిన గౌరవాన్ని అందిస్తుందని భరోసా వ్యక్తం చేశారు.
