జన గళం ఆంధ్రప్రదేశ్ డెస్క్: కాపునాడు జాతీయ అధ్యక్షులు, ప్రముఖ సామాజిక నాయకులు శ్రీ గాళ్ళ సుబ్రమణ్యం గారు అనారోగ్య కారణాలతో మంగళవారం మధ్యాహ్నం తుదిశ్వాస విడిచారు. కొంతకాలంగా అనారోగ్య సమస్యలతో బాధపడుతున్న ఆయన ఆరోగ్య పరిస్థితి విషమించడంతో స్వర్గస్తులయ్యారు. ఆయన అకాల మరణం కాపు వర్గాలతో పాటు తెలుగు రాష్ట్రాల సామాజిక, రాజకీయ రంగాల్లో తీవ్ర దిగ్భ్రాంతిని, విషాదాన్ని నింపింది.
సమాజ అభ్యున్నతి కోసం, బడుగు బలహీన వర్గాల హక్కుల పరిరక్షణ కోసం గాళ్ళ సుబ్రమణ్యం గారు జీవితాంతం నిస్వార్థంగా పోరాడారు. కాపునాడు సంస్థను జాతీయ స్థాయిలో సమర్థవంతంగా నడిపిస్తూ, ఎందరో యువతకు మార్గదర్శిగా నిలిచారు. ఆయన మరణవార్త తెలిసిన వెంటనే పలువురు రాజకీయ, సామాజిక ప్రముఖులు, ఉద్యమ సహచరులు తీవ్ర ఆవేదన వ్యక్తం చేస్తూ నివాళులర్పిస్తున్నారు. ఆయన మృతి సమాజానికి, ప్రజా ఉద్యమాలకు తీరని లోటని పేర్కొన్నారు.
గాళ్ళ సుబ్రమణ్యం గారి పవిత్ర ఆత్మకు శాంతి చేకూరాలని ప్రార్థిస్తూ ‘జన గళం’ తెలుగు డిజిటల్ పత్రిక యాజమాన్యం మరియు సంపాదక వర్గం తమ ప్రగాఢ సంతాపాన్ని తెలియజేసింది. ఈ క్లిష్ట సమయంలో వారి కుటుంబ సభ్యులకు, అభిమానులకు, కాపునాడు శ్రేణులకు ఆ భగవంతుడు మనోధైర్యాన్ని ప్రసాదించాలని కోరుతూ ప్రగాఢ సానుభూతిని ప్రకటించింది.