జన గళం ఆంధ్రప్రదేశ్ డెస్క్: కృష్ణా జిల్లా బంటుమిల్లి మండల తహసీల్దార్ కార్యాలయం ఎదుట గ్రామ రెవెన్యూ సహాయకులు (వీఆర్ఏలు) చేపట్టిన నిరసన కార్యక్రమం మంగళవారంతో ఏడో రోజుకు చేరుకుంది. పెరిగిన నిత్యావసర వస్తువుల ధరలు, కుటుంబ పోషణ భారంగా మారిన నేపథ్యంలో తమ వేతనాలు తక్షణమే పెంచాలని డిమాండ్ చేస్తూ వారు ఆందోళనను కొనసాగిస్తున్నారు. చాలీచాలని వేతనాలతో కాలం వెళ్లదీయలేకపోతున్నామని, విధుల విషయంలో అదనపు పనులు చేయించుకుంటున్న ప్రభుత్వం వేతనాల పెంపును మాత్రం పట్టించుకోవడం లేదని ఆవేదన వ్యక్తం చేశారు.
ఉన్నత విద్యాభ్యాసం చేసి, అర్హత పరీక్షలు రాసి విధుల్లో చేరినప్పటికీ తమకు తీవ్ర అన్యాయం జరుగుతోందని పలువురు వీఆర్ఏలు వాపోయారు. ఉద్యోగంలో చేరినప్పుడు పదోన్నతులు వస్తాయని ఆశించామని, సుమారు 12 ఏళ్లు గడుస్తున్నా ఒక్క పదోన్నతి కూడా కల్పించలేదని పేర్కొన్నారు. గతంలో చంద్రబాబు నాయుడు ముఖ్యమంత్రిగా ఉన్న సమయంలో పెంచిన జీతాలే తప్ప, గత తొమ్మిదేళ్లుగా వేతనాల పెంపు ఊసే లేదని గుర్తుచేశారు. కూటమి ప్రభుత్వం వెంటనే స్పందించి వేతనాల పెంపుతో పాటు పదోన్నతులు కల్పించాలని, న్యాయమైన డిమాండ్లు పరిష్కరించే వరకు తమ పోరాటం ఆగదని స్పష్టం చేశారు.
