రచన: జన గళం అవనిగడ్డ డెస్క్: దివిసీమ ప్రజల ఆరాధ్య దైవం, కొంగుబంగారంగా విరాజిల్లుతున్న అవనిగడ్డ శ్రీ లంకమ్మ తల్లి దేవస్థానంలో ఈ ఏడాది దసరా శరన్నవరాత్రి ఉత్సవాలను అత్యంత వైభవంగా నిర్వహించేందుకు అధికార యంత్రాంగం, పాలకమండలి సమాయత్తమవుతున్నాయి. అక్టోబర్ 11, 2026 నుంచి అమ్మవారి శరన్నవరాత్రులు శాస్త్రోక్తంగా ప్రారంభం కానున్నాయి. ఈ పవిత్ర మహోత్సవాలను పురస్కరించుకుని ఆలయ కమిటీ ముద్రించిన నవరాత్రుల అధికారిక ఆహ్వాన కరపత్రికను స్థానిక శాసనసభ్యులు మండలి బుద్ధప్రసాద్‌కు ఆలయ అధికారులు, ధర్మకర్తల మండలి సభ్యులు శనివారం మర్యాదపూర్వకంగా అందజేశారు.
అవనిగడ్డలోని ఎమ్మెల్యే నివాసంలో ఆయనను కలిసిన ఆలయ ఈవో యార్లగడ్డ శ్రీనివాసరావు, ఈవో ఏడుకొండలు, ధర్మకర్తల మండలి చైర్మన్ ఆనపరెడ్డి వెంకటస్వామి, కమిటీ సభ్యురాలు ధనసుందరి మరియు ఇతర ధర్మకర్తలు అమ్మవారి శేషవస్త్రాలు, తీర్థప్రసాదాలు సమర్పించి ఉత్సవాలకు సాదరంగా ఆహ్వానించారు. తొమ్మిది రోజుల పాటు సాగే నవరాత్రుల్లో అమ్మవారి వివిధ అలంకారాల విశేషాలు, పూజా కార్యక్రమాల వివరాలను ఎమ్మెల్యేకు వివరించారు. ఈ సందర్భంగా ఎమ్మెల్యే మండలి బుద్ధప్రసాద్ మాట్లాడుతూ.. ఉత్సవాలకు దివిసీమ నలుమూలల నుంచే కాకుండా ఇతర ప్రాంతాల నుంచి కూడా భక్తులు భారీగా తరలివచ్చే అవకాశం ఉన్నందున క్యూలైన్లు, తాగునీరు, పారిశుద్ధ్యం, నిత్యాన్నదానం మరియు భద్రతా ఏర్పాట్లలో ఎలాంటి లోటుపాట్లు లేకుండా ముందస్తు చర్యలు చేపట్టాలని అధికారులకు సూచించారు.
