రచన: జన గళం బ్యూరో, పశ్చిమ గోదావరి: పశ్చిమ గోదావరి జిల్లాలోని ప్రధాన అసెంబ్లీ నియోజకవర్గాల్లో తాజా రాజకీయ పరిస్థితులు, ప్రజాభిప్రాయాన్ని విశ్లేషిస్తూ ప్రవీణ్ పుల్లాట నేతృత్వంలోని ‘రైజ్ గ్రూప్’ (RISE Group) తాజాగా రూపొందించిన ‘పొలిటికల్ ఎక్స్‌రే 2026’ గ్రౌండ్ అసెస్‌మెంట్ నివేదిక రాజకీయ వర్గాల్లో తీవ్ర చర్చనీయాంశంగా మారింది. క్షేత్రస్థాయి సమగ్ర పరిశోధన ఆధారంగా విడుదల చేసిన ఈ అంచనాల ప్రకారం జిల్లాలోని ఏడు కీలక నియోజకవర్గాల్లో కూటమి పార్టీల బలాబలాలు ఆసక్తికరంగా నమోదయ్యాయి.
ఈ సర్వే నివేదిక ప్రకారం కీలకమైన నర్సాపురం, భీమవరం నియోజకవర్గాలు కూటమికి అత్యంత క్లిష్టమైన ‘రిస్క్ జోన్’లో ఉన్నట్లు వెల్లడైంది. మరోవైపు పాలకొల్లు, ఉండి, తణుకు నియోజకవర్గాల్లో కూటమి పట్టు నిలుపుకుంటూ ‘సేఫ్ జోన్’లో భద్రమైన స్థితిలో కొనసాగుతున్నట్లు నివేదిక స్పష్టం చేసింది. ఇక ఆచంట, తాడేపల్లిగూడెం నియోజకవర్గాల్లో ప్రజల నుంచి ‘మిశ్రమ స్పందన’ వ్యక్తమవుతోందని తేలింది. స్థానిక శాసనసభ్యుల పనితీరు, ప్రజా సమస్యల పరిష్కారం, కూటమి పార్టీల మధ్య సమన్వయమే ఈ ఫలితాలపై ప్రధాన ప్రభావం చూపుతున్నాయని, రాబోయే స్థానిక సంస్థల ఎన్నికల ముంగిట ఈ గ్రౌండ్ రిపోర్ట్ జిల్లా కూటమి నాయకత్వానికి కీలక హెచ్చరికగా మారిందని రాజకీయ పరిశీలకులు విశ్లేషిస్తున్నారు.
