జన గళం రంపచోడవరం/అల్లూరి సీతారామరాజు జిల్లా బ్యూరో: ఆంధ్రప్రదేశ్ ఉప ముఖ్యమంత్రి, పంచాయతీరాజ్, గ్రామీణాభివృద్ధి మరియు అటవీ పర్యావరణ శాఖల మంత్రి శ్రీ పవన్ కల్యాణ్ ఈనెల 8న అల్లూరి సీతారామరాజు జిల్లా రంపచోడవరం మన్యం ప్రాంతంలో విస్తృతంగా పర్యటించనున్నారు. ఏజెన్సీ ప్రాంతాల్లోని మారుమూల గిరిజన గ్రామాల సమస్యలను క్షేత్రస్థాయిలో స్వయంగా తెలుసుకునేందుకు ఈ పర్యటన ఖరారైంది.
పర్యటనలో భాగంగా డిప్యూటీ సీఎం కాకవాడ, కాకవాడ గండి, రాకోట, చేలక వీధి తదితర గిరిజన ఆవాసాలలో స్వయంగా పర్యటిస్తారు. అక్కడ నివసిస్తున్న గిరిజనులతో నేరుగా ముఖాముఖి సంభాషిస్తూ, స్థానిక గిరిజన పెద్దలు, మహిళలు, యువతతో కలిసి ‘రచ్చబండ’ కార్యక్రమంలో పాల్గొంటారు. ఏజెన్సీ ప్రాంతాల్లో తాగునీరు, అంతర్గత రహదారులు, విద్యుద్దీకరణ, విద్య, వైద్య సదుపాయాలు, అటవీ హక్కుల చట్టం అమలు మరియు జీవనోపాధి అవకాశాలపై గిరిజనుల వినతులను స్వీకరించి అక్కడికక్కడే అధికారులతో సమీక్షించనున్నారు. డిప్యూటీ సీఎం పర్యటన నేపథ్యంలో జిల్లా యంత్రాంగం, ఐటీడీఏ అధికారులు పటిష్ట ఏర్పాట్లు చేస్తున్నారు.
