జన గళం విజయవాడ తూర్పు బ్యూరో: విజయవాడ తూర్పు నియోజకవర్గ పరిధిలోని నిరుపేద కుటుంబాల జీవనోపాధిని మెరుగుపరిచేందుకు శాసనసభ్యులు శ్రీ గద్దె రామ్మోహన్ బాసటగా నిలిచారు. బుధవారం ఉదయం నియోజకవర్గంలోని 11వ డివిజన్‌ పరిధి హైస్కూల్‌ రోడ్డులో పేద కుటుంబాలకు ఉపాధి అవకాశాలు కల్పించే కార్యక్రమంలో భాగంగా తోపుడు బండ్ల పంపిణీ జరిగింది. ఈ కార్యక్రమానికి ముఖ్య అతిథిగా హాజరైన ఎమ్మెల్యే గద్దె రామ్మోహన్.. నిరుపేద కుటుంబాలకు చెందిన పల్లి సూరమ్మ, శివపార్వతి, గిరిడి నారాయణమ్మ, కుమార్‌లకు స్వయంగా తోపుడు బండ్లను అందజేశారు.
ఈ సందర్భంగా ఎమ్మెల్యే గద్దె రామ్మోహన్ మాట్లాడుతూ.. పేద కుటుంబాలు స్వయం ఉపాధి ద్వారా ఆర్థిక స్వాలంబన సాధించి గౌరవప్రదమైన జీవనం సాగించాలన్నదే తమ లక్ష్యమని పేర్కొన్నారు. చిన్న తరహా వ్యాపారాలు చేసుకునే చిరు వ్యాపారులకు, పేదలకు ఇలాంటి తోపుడు బండ్లు ఎంతగానో ఉపయోగపడతాయన్నారు. నియోజకవర్గంలో పేదరిక నిర్మూలనకు, అట్టడుగు వర్గాల సంక్షేమానికి కూటమి ప్రభుత్వం నిరంతరం అండగా ఉంటుందని భరోసా ఇచ్చారు. తమ జీవనోపాధికి తోడ్పాటు అందించినందుకు లబ్ధిదారులు ఎమ్మెల్యే గద్దె రామ్మోహన్‌కు కృతజ్ఞతలు తెలిపారు. ఈ కార్యక్రమంలో స్థానిక కూటమి నాయకులు, ప్రజాప్రతినిధులు, కాలనీవాసులు పాల్గొన్నారు.
