జన గళం సత్తెనపల్లి/పల్నాడు బ్యూరో: పల్నాడు జిల్లా సత్తెనపల్లి పట్టణంలో ప్రజాభీష్టానికి వ్యతిరేకంగా, మహిళల తీవ్ర నిరసనల నడుమ ఏర్పాటు చేస్తున్న “కల్యాణి వైన్ షాప్” వ్యవహారం చిలికి చిలికి గాలివానలా మారింది. స్థానిక కూరగాయల మార్కెట్, నిత్యం భక్తులతో కిటకిటలాడే వెంకటేశ్వరస్వామి దేవాలయానికి కూతవేటు దూరంలో, ప్రధాన వాణిజ్య సముదాయాల మధ్య నూతన మద్యం దుకాణాన్ని ఏర్పాటు చేయడంపై స్థానికులు, మహిళలు తీవ్రస్థాయిలో ఆగ్రహం వ్యక్తం చేస్తున్నారు. అధికారుల బలప్రయోగంతో, ప్రజాప్రతినిధుల అండదండలతోనే ఈ దుకాణాన్ని ఏర్పాటు చేస్తున్నారంటూ సర్వత్రా విమర్శలు వెల్లువెత్తుతున్నాయి.
గతంలో ఇక్కడ ఉన్న వైన్ షాపును ప్రజల విజ్ఞప్తుల మేరకు తొలగించినప్పటికీ, ప్రభుత్వం మారిన తర్వాత తిరిగి అదే స్థలంలో మద్యం దుకాణానికి అనుమతులు మంజూరు చేయడంపై స్థానికులు విస్మయం వ్యక్తం చేశారు. నిత్యావసరాలు, కూరగాయల కొనుగోలుకు వచ్చే మహిళలకు, దేవాలయానికి వచ్చే భక్తులకు తీవ్ర ఆటంకం కలుగుతుందని జిల్లా కలెక్టర్‌తో పాటు స్థానిక ఎక్సైజ్ అధికారులకు పదే పదే వినతిపత్రాలు అందజేసినా యంత్రాంగం నిమ్మకు నీరెత్తినట్లు వ్యవహరించింది. దాంతో గత్యంతరం లేని పరిస్థితుల్లో స్థానికులు, మహిళలు న్యాయం కోసం సత్తెనపల్లి ప్రిన్సిపల్ జూనియర్ సివిల్ జడ్జి కోర్టును ఆశ్రయించారు (దావా నెం. 773/2026). ఈ పిటిషన్‌ను స్వీకరించిన న్యాయస్థానం వెంటనే స్పందించి సంబంధిత వ్యక్తులకు, అధికారులకు అర్జెంట్ నోటీసులు జారీ చేసిందని ప్రముఖ న్యాయవాది సాంబశివరావు సోషల్ మీడియా వేదికగా వెల్లడించారు. స్థానిక సంస్థల ఎన్నికల వేళ ప్రజల ఆందోళనను గుర్తించి, అధికారులు వెంటనే స్పందించి మద్యం దుకాణాన్ని రద్దీ లేని ప్రదేశానికి తరలించాలని స్థానిక ప్రజలు గట్టిగా డిమాండ్ చేస్తున్నారు.
