జన గళం అమరావతి బ్యూరో: ప్రధానమంత్రి శ్రీ నరేంద్ర మోదీ రాజనీతిజ్ఞుడిగా, పరిపాలకుడిగా 25 ఏళ్ల సుదీర్ఘ ప్రజాప్రస్థానాన్ని విజయవంతంగా పూర్తి చేసుకున్న సందర్భంగా ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత శ్రీ పవన్ కల్యాణ్ ప్రధానికి హృదయపూర్వక అభినందనలు, శుభాకాంక్షలు తెలిపారు. ఈ మేరకు ఆయన ప్రత్యేక సందేశాన్ని విడుదల చేశారు. 2001 అక్టోబర్ 7న గుజరాత్ ప్రజలు ఉంచిన అపారమైన నమ్మకంతో ముఖ్యమంత్రిగా ప్రమాణస్వీకారం చేసిన నాటి నుంచి నేటి వరకు ప్రధాని ప్రస్థానం అద్భుతమైనదని కొనియాడారు.
26 మంది ఎంపీలు, 182 మంది ఎమ్మెల్యేలు ఉన్న గుజరాత్ రాష్ట్రంపై మొదలైన ఆ విశ్వాసం క్రమంగా యావత్ భారత జాతి నమ్మకంగా మారిందని పేర్కొన్నారు. ఆ ప్రజావిశ్వాసమే వరుసగా మూడు పర్యాయాలు దేశ ప్రధానిగా బాధ్యతలు నిర్వర్తించేలా దేశ ప్రజలతో చారిత్రక తీర్పును ఇప్పించిందని గుర్తుచేశారు. 25 ఏళ్ల నిరంతర ప్రజాసేవ పూర్తయినప్పటికీ, తొలినాళ్లలో ఉన్న అదే నిబద్ధతతో, ‘జాతి ప్రథమం’ (Nation First) అనే దృక్పథంతో నరేంద్ర మోదీ అవిశ్రాంతంగా శ్రమిస్తున్నారని ప్రశంసించారు. ‘వికసిత్ భారత్’ లక్ష్య సాధన దిశగా దేశాన్ని నడిపిస్తున్న ప్రధాని మోదీకి సంపూర్ణ ఆయురారోగ్యాలు కలగాలని ఆకాంక్షిస్తూ పవన్ కల్యాణ్ శుభాకాంక్షలు తెలియజేశారు.
