జన గళం విజయవాడ బ్యూరో: ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత శ్రీ పవన్ కల్యాణ్ ఆశయాలు, కూటమి ప్రభుత్వ ప్రజాపాలనకు ఆకర్షితులై విజయవాడ పార్లమెంట్ పరిధిలో ఇతర పార్టీల నుంచి జనసేనలోకి భారీ చేరికలు చోటుచేసుకున్నాయి. బుధవారం విజయవాడలో నిర్వహించిన కార్యక్రమంలో పార్టీ ప్రధాన కార్యదర్శి, శాసనమండలి సభ్యులు, ఏపీ గ్రీన్ ఎగ్జిక్యూటివ్ కమిటీ చైర్మన్ శ్రీ నాగబాబు ముఖ్య అతిథిగా పాల్గొని వైసీపీ, సీపీఎం నాయకులతో పాటు ప్రముఖ విద్యావేత్తలు, వ్యాపారవేత్తలు, సామాజిక కార్యకర్తలకు పార్టీ కండువాలు కప్పి సాదరంగా ఆహ్వానించారు. పార్టీ రాష్ట్ర కార్యదర్శి, విజయవాడ పార్లమెంట్ నియోజకవర్గ సమన్వయకర్త శ్రీ అమ్మిశెట్టి వాసు ఆధ్వర్యంలో సుమారు 300 మంది ముఖ్య కార్యకర్తలు జనసేన పార్టీలో చేరారు.
వైసీపీ ప్రముఖ నేతలు మధుసూదన్, కటకం జ్యోతి, ఆల్లూరి శంకర్, మర్రి బెంజిమన్, అలాగే సీపీఎం సీనియర్ నాయకుడు కొంపెల్ల భాను లక్ష్మీ నారాయణలతో పాటు పలు ప్రైవేట్ విద్యాసంస్థల కరస్పాండెంట్లు, ప్రిన్సిపాళ్లు విజయవాడ తూర్పు, పశ్చిమ, సెంట్రల్, గన్నవరం నియోజకవర్గాల నుంచి పార్టీ తీర్థం పుచ్చుకున్నారు. ఈ సందర్భంగా నాగబాబు మాట్లాడుతూ.. పవన్ కల్యాణ్ కార్యకర్తలను సొంత కుటుంబ సభ్యుల్లా ఆదరిస్తారని, క్షేత్రస్థాయిలో పార్టీ కోసం శ్రమించిన ప్రతి ఒక్కరికీ తగిన గుర్తింపు, సముచిత గౌరవం దక్కుతాయని స్పష్టం చేశారు. త్వరలో జరగనున్న స్థానిక సంస్థల ఎన్నికల్లో పార్టీకి నిబద్ధతతో పనిచేసిన అర్హులైన కార్యకర్తలకు కచ్చితంగా న్యాయం జరుగుతుందని భరోసా ఇచ్చారు.
అనంతరం అమ్మిశెట్టి వాసు ఆధ్వర్యంలో చిరు వ్యాపారులు, జనసైనికుల స్వావలంబన కోసం ఏర్పాటు చేసిన సేవా కార్యక్రమంలో నాగబాబు పాల్గొన్నారు. 40 మంది జనసైనికులకు ఆటోలు, 25 మంది వీరమహిళలకు కుట్టు మిషన్లు, 25 మంది చిరు వ్యాపారులకు తోపుడు బండ్లను ఆయన చేతుల మీదుగా పంపిణీ చేశారు. ఈ కార్యక్రమంలో పార్టీ ప్రధాన కార్యదర్శి తాళ్లూరి రామ్, ఏపీ పోలీస్ హౌసింగ్ కార్పొరేషన్ చైర్మన్ కళ్యాణం శివశ్రీనివాస్, ఏపీఐఐసీ డైరెక్టర్ మండలి రాజేష్, సీనియర్ నేత పెనుగొండ సుబ్బారాయుడు, దుర్గగుడి ట్రస్ట్ బోర్డు సభ్యురాలు పద్మావతి ఠాకూర్, హజ్ కమిటీ సభ్యులు అబిద్, వీర మహిళా నేతలు రావి సౌజన్య, మల్లెపు విజయలక్ష్మి, నాయకులు బొలిశెట్టి వంశీ, అజయ్ వర్మ ఠాకూర్, లకనం శ్యాంప్రసాద్, ఇల్లూరి సుగుణబాబు తదితరులు పాల్గొన్నారు.