జన గళం మచిలీపట్నం బ్యూరో: మచిలీపట్నం పార్లమెంట్ నియోజకవర్గ పరిధిలో జరుగుతున్న జాతీయ రహదారుల విస్తరణ, వంతెనల నిర్మాణ పనులను శరవేగంగా పూర్తి చేయడమే లక్ష్యంగా పార్లమెంట్ సభ్యులు శ్రీ వల్లభనేని బాలశౌరి అధికార యంత్రాంగాన్ని పరుగులు పెట్టిస్తున్నారు. మచిలీపట్నంలోని తన ఎంపీ క్యాంపు కార్యాలయంలో నేషనల్ హైవేస్ అథారిటీ ఆఫ్ ఇండియా (NHAI) ఉన్నతాధికారులతో ఆయన ప్రత్యేక సమీక్షా సమావేశం నిర్వహించారు. నియోజకవర్గంలో పెండింగ్‌లో ఉన్న రహదారుల ప్రగతిని మ్యాపులు, ప్రాజెక్టు నివేదికల ద్వారా క్షుణ్ణంగా పరిశీలించారు.
ఈ సందర్భంగా గుడివాడ పట్టణంలో ట్రాఫిక్ సమస్యలకు శాశ్వత పరిష్కారం చూపే అత్యంత ప్రతిష్టాత్మకమైన గుడివాడ ఫ్లైఓవర్ నిర్మాణ పనులు, పట్టణ పరిధిలోని అంతర్గత రహదారుల అభివృద్ధి, అలాగే నందివాడ మండలం పుట్టంగుంట వద్ద బుడమేరు వాగుపై నిర్మించనున్న నూతన వంతెన (బ్రిడ్జి) పనులపై అధికారులతో సుదీర్ఘంగా చర్చించారు. నిధుల విడుదల, సాంకేతిక అనుమతుల్లో ఎలాంటి జాప్యం లేకుండా చూస్తూ, ప్రజలకు రవాణా ఇబ్బందులు కలగకుండా నిర్ణీత గడువులోగా నాణ్యతతో పనులను పూర్తి చేయాలని ఎన్‌హెచ్ అధికారులను ఆదేశించారు. ప్రజా రవాణా వ్యవస్థను ఆధునీకరించే ప్రాజెక్టులకు ప్రభుత్వం అధిక ప్రాధాన్యం ఇస్తోందని, క్షేత్రస్థాయిలో సమస్యలుంటే వెంటనే తన దృష్టికి తీసుకురావాలని ఎంపీ స్పష్టం చేశారు.
