జన గళం అవనిగడ్డ బ్యూరో: రాబోయే స్థానిక సంస్థల ఎన్నికల్లో ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కల్యాణ్ ఏయే స్థానాలను ఖరారు చేస్తారో వాటన్నింటిలోనూ కూటమి అభ్యర్థుల అఖండ విజయం సాధించేందుకు శ్రేణులంతా సమిష్టిగా కృషి చేయాలని అవనిగడ్డ శాసనసభ్యులు శ్రీ మండలి బుద్ధప్రసాద్ పిలుపునిచ్చారు. బుధవారం సాయంత్రం అవనిగడ్డలోని ఎమ్మెల్యే క్యాంపు కార్యాలయంలో కోడూరు మండలం మాచవరం గ్రామానికి చెందిన పలువురు వైఎస్సార్ కాంగ్రెస్ పార్టీ నాయకులు జనసేన పార్టీలో చేరారు. స్థానిక జనసేన నేతలు రెడ్రౌతు కృష్ణబాబు, కూరాకుల చంద్రశేఖర్ ఆధ్వర్యంలో తరలివచ్చిన వీరికి ఎమ్మెల్యే మండలి బుద్ధప్రసాద్, నియోజకవర్గ యువనాయకుడు మండలి వెంకట్రామ్ పార్టీ కండువాలు కప్పి సాదరంగా ఆహ్వానించారు. చేరిన వారిలో విస్సంశెట్టి గంగారావు, విస్సంశెట్టి పున్నారావు, కూరాకుల సుబ్బారావు, కూరాకుల శివరామకృష్ణ, కోట ఆదిశేషు, జరుగు రామాంజనేయులు, నల్లూరి రమేష్, కూరాకుల ఆంజనేయులు, నల్లూరి వెంకటేశ్వరరావు, కూరాకుల మధు, నల్లూరి రామాంజనేయులు, నల్లూరి నాగ రమేష్ ఉన్నారు.
ఈ సందర్భంగా ఎమ్మెల్యే బుద్ధప్రసాద్ మాట్లాడుతూ.. గ్రామాల సమగ్ర వికాసానికి కీలకమైన పంచాయతీరాజ్, గ్రామీణాభివృద్ధి శాఖ బాధ్యతలను స్వీకరించిన ఉప ముఖ్యమంత్రి పవన్ కల్యాణ్, కేంద్రం నుంచి భారీగా నిధులు రాబట్టి పల్లెల రూపురేఖలు మారుస్తున్నారని కొనియాడారు. గత పాలకుల నిర్లక్ష్యానికి గురైన గ్రామీణ, అంతర్గత రహదారులను యుద్ధప్రాతిపదికన అభివృద్ధి చేస్తున్నామని చెప్పారు. గత ప్రభుత్వంలో అధ్వానంగా మారిన కోడూరు రోడ్డుతో ప్రజలు తీవ్ర ఇబ్బందులు పడ్డారని, కూటమి పాలనలో జరుగుతున్న అభివృద్ధిని చూసే వైసీపీ నేతలు జనసేన వైపు వస్తున్నారని పేర్కొన్నారు. మాచవరంలో త్వరలోనే మరిన్ని సీసీ రోడ్లతో పాటు డొంక రోడ్ల నిర్మాణం కూడా చేపడతామని హామీ ఇచ్చారు. పాత విభేదాలను పక్కనబెట్టి గ్రామాల్లో ఐక్యంగా ముందుకు సాగాలని సూచించారు. ఈ కార్యక్రమంలో ఏఎంసీ డైరెక్టర్ జరుగు ఆదినారాయణ, నాయకులు జరుగు పోతురాజు, జరుగు లక్ష్మణ, అరజా నగరాయలు పాల్గొన్నారు.
