జన గళం తుళ్లూరు/అమరావతి బ్యూరో: దేశ ప్రధానమంత్రి శ్రీ నరేంద్ర మోదీ ప్రజా జీవితంలో 25 ఏళ్ల సుదీర్ఘ ప్రస్థానాన్ని పూర్తి చేసుకున్న చారిత్రక సందర్భాన్ని పురస్కరించుకుని అమరావతి రాజధాని పరిధిలోని వెంకటపాలెం తిరుమల తిరుపతి దేవస్థానం (టీటీడీ) శ్రీ వేంకటేశ్వరస్వామి వారి ఆలయంలో ఘనంగా ప్రత్యేక పూజలు నిర్వహించారు. ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత శ్రీ పవన్ కల్యాణ్ ఆదేశాల మేరకు ఎన్టీఆర్ జిల్లా జనసేన పార్టీ అధ్యక్షులు శ్రీ సామినేని ఉదయభాను బుధవారం శ్రీవారిని దర్శించుకుని ప్రత్యేక అర్చనలు, పూజా కార్యక్రమాల్లో పాల్గొన్నారు.
ఈ సందర్భంగా సామినేని ఉదయభాను మాట్లాడుతూ.. ప్రధాని నరేంద్ర మోదీ నిరంతరం ప్రజాసేవకే అంకితమై పాతికేళ్ల సుదీర్ఘ రాజకీయ ప్రస్థానాన్ని విజయవంతంగా పూర్తి చేసుకోవడం దేశానికే గర్వకారణమన్నారు. మోదీకి సంపూర్ణ ఆయురారోగ్యాలు, దీర్ఘాయుష్షు ప్రసాదించాలని, ఆయన సమర్థవంతమైన నాయకత్వంలో భారతదేశం మరింత అభివృద్ధి పథంలో పయనించి ‘వికసిత్ భారత్’ లక్ష్యాన్ని వేగవంతంగా చేరుకోవాలని వేంకటేశ్వరస్వామి వారిని మనస్ఫూర్తిగా ప్రార్థించినట్లు తెలిపారు. ఈ పూజా కార్యక్రమంలో జనసేన పార్టీ నాయకులు, కార్యకర్తలు పెద్ద సంఖ్యలో పాల్గొన్నారు.
