జన గళం తిరుమల/విజయవాడ బ్యూరో: కలియుగ వైకుంఠమైన తిరుమల తిరుపతి దేవస్థానంలో (టీటీడీ) సామాన్య భక్తుడు ఎదుర్కొంటున్న దర్శన కష్టాలు మరోసారి చర్చనీయాంశంగా మారాయి. తిరుమలలో సాధారణ భక్తులకు స్వామివారి దర్శనం గౌరవప్రదంగా, సులభంగా దక్కేలా నూతన మార్పులు తీసుకురావాలని కోరుతూ సామాజిక మాధ్యమాల్లో పెద్ద ఎత్తున చర్చ మొదలైంది. ప్రభుత్వం, ప్రజాప్రతినిధులు అనుకుంటే తప్పకుండా పరిష్కరించగలిగే ఈ సమస్యపై ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కల్యాణ్, మంత్రి నారా లోకేష్ ప్రత్యేక దృష్టి సారించాలని భక్తులు బహిరంగంగా విజ్ఞప్తి చేస్తున్నారు.
అధికారంలో ఉన్నా లేకున్నా వీఐపీలు, ప్రజాప్రతినిధులు బ్రేక్ మరియు ప్రొటోకాల్ దర్శనాల ద్వారా వెళ్లిపోతుండటం వల్ల క్యూలైన్లలో గంటల తరబడి నిరీక్షించే సామాన్య భక్తుల కష్టాలు పాలకులకు తెలియడం లేదని ఆవేదన వ్యక్తమవుతోంది. ప్రజాప్రతినిధులు ఎలాంటి అధికారిక హోదా లేదా సిఫారసు లేకుండా స్వయంగా ఆన్‌లైన్‌లో రూ.300 ప్రత్యేక ప్రవేశ దర్శనం (SED) టికెట్ బుక్ చేసుకోవడమో, లేదంటే తిరుపతిలో ఇచ్చే ఎస్‌ఎస్‌డీ (SSD) టోకెన్ల కోసం సాధారణ భక్తులతో కలిసి క్యూలో నిలబడితేనే క్షేత్రస్థాయి వాస్తవాలు బోధపడతాయని అభిప్రాయపడుతున్నారు. ప్రతి హిందూ కుటుంబం ఏడాదికి కనీసం ఒక్కసారైనా స్వామివారిని దర్శించుకోవాలని ఎంతో భక్తితో వచ్చి, చివరకు టీటీడీ వ్యవస్థాపరమైన లోపాల వల్ల అసంతృప్తితో వెనుదిరగాల్సిన పరిస్థితి మారాలని కోరుతున్నారు. సామాన్యుడికి పెద్దపీట వేసేలా మరింత పారదర్శక, సరళతర దర్శన విధానాన్ని కూటమి ప్రభుత్వం తీసుకురావాలని వేడుకుంటున్నారు.
Slug: tirumala-srivari-darshan-common-pilgrim-issues-open-plea-to-cbn-pawan-kalyan-lokesh-ttd-reforms