జన గళం ఆంధ్రప్రదేశ్ డెస్క్: బడుగు, బలహీన వర్గాలకు రాజకీయంగా సముచిత ప్రాతినిధ్యం కల్పించడంతో పాటు స్థానిక సంస్థల్లో 34 శాతం బీసీ రిజర్వేషన్లను అమలు చేయడమే ధ్యేయంగా కూటమి ప్రభుత్వం పూర్తి చిత్తశుద్ధితో పనిచేస్తోందని తిరువూరు శాసనసభ్యులు కొలికపూడి శ్రీనివాసరావు స్పష్టం చేశారు. ఎన్టీఆర్ జిల్లా తిరువూరు నియోజకవర్గంలో బీసీలకు 34 శాతం రిజర్వేషన్ల అమలును ఆకాంక్షిస్తూ మరియు దానిపై ప్రజల్లో అవగాహన కల్పించేందుకు ఎమ్మెల్యే కొలికపూడి శ్రీనివాసరావు ఆధ్వర్యంలో ప్రతిష్టాత్మకమైన “జయహో బీసీ” బైక్ ర్యాలీ నిర్వహించారు. కొండపర్వ నుంచి నెమలి వరకు సుమారు 100 కిలోమీటర్ల మేర సాగిన ఈ భారీ బైక్ ర్యాలీకి బీసీ వర్గాల నుంచి విశేష స్పందన లభించింది.
ఈ ర్యాలీ ముగింపు సందర్భంగా నెమలి గ్రామంలో ఏర్పాటు చేసిన మీడియా సమావేశంలో ఎమ్మెల్యే కొలికపూడి శ్రీనివాసరావు మాట్లాడారు. బీసీలకు 34 శాతం రిజర్వేషన్లు కల్పించేందుకు అసెంబ్లీలో ప్రత్యేక తీర్మానం చేయించిన ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ మరియు ఎన్డీఏ నాయకత్వానికి ఆయన కృతజ్ఞతలు తెలిపారు. గత వైఎస్సార్ కాంగ్రెస్ పార్టీ ప్రభుత్వ హయాంలో బీసీ రిజర్వేషన్లను తగ్గించడం వల్ల గ్రామస్థాయి పదవుల నుంచి మేయర్లు, జడ్పీ చైర్మన్ల వరకు సుమారు 16 వేల మంది బీసీలు తమ రాజకీయ ప్రాతినిధ్యాన్ని కోల్పోయారని మండిపడ్డారు.
అంతేకాకుండా, స్థానిక సంస్థల్లో బీసీలకు 34 శాతం రిజర్వేషన్ల కల్పనను అడ్డుకునేలా వైఎస్సార్‌సీపీ న్యాయస్థానాలను ఆశ్రయించిందని, ఈ అంశం హైకోర్టు నుంచి సుప్రీంకోర్టుకు వెళ్లిన విషయాన్ని గుర్తుచేశారు. రేపో, మాపో దీనిపై తుది తీర్పు వెలువడే అవకాశం ఉందని తెలిపారు. ఎన్ని అడ్డంకులు ఎదురైనా బీసీలకు న్యాయం చేయడం, వారికి రాజకీయంగా సముచిత స్థానం కల్పించడమే లక్ష్యంగా కూటమి ప్రభుత్వం ముందుకు సాగుతుందని స్పష్టం చేశారు. బీసీల హక్కుల పరిరక్షణ కోసమే చేపట్టిన ఈ 100 కిలోమీటర్ల “జయహో బీసీ” బైక్ ర్యాలీలో కూటమి నాయకులు, కార్యకర్తలు మరియు పెద్ద సంఖ్యలో బీసీ సోదరులు ఉత్సాహంగా పాలుపంచుకున్నారు.
Slug: tiruvuru-kolikapudi-srinivasarao-jayaho-bc-bike-rally