జన గళం ఆంధ్రప్రదేశ్ డెస్క్: ఎన్టీఆర్ జిల్లా రెడ్డిగూడెం మండలంలోని మద్దులపర్వ పంచాయతీ పరిధిలో గ్రామీణ ప్రాంతాల అభివృద్ధిని మరింత వేగవంతం చేసే దిశగా కీలక అడుగు పడింది. వీబీ-జీ రామ్‌జీ నిధులతో సుమారు డెబ్బై ఐదు లక్షల రూపాయల అంచనా వ్యయంతో చేపట్టనున్న 1150 మీటర్ల పొడవైన నూతన సీసీ రోడ్ల నిర్మాణ పనులకు మైలవరం శాసనసభ్యులు, టీడీపీ రాష్ట్ర అధికార ప్రతినిధి వసంత వెంకట కృష్ణప్రసాద్ శుక్రవారం ఘనంగా శంకుస్థాపన చేశారు. గ్రామీణ ప్రాంతాల్లో రవాణా వ్యవస్థను మెరుగుపరచడం, ప్రజలకు మెరుగైన రహదారి సౌకర్యాలు కల్పించడమే ధ్యేయంగా కూటమి ప్రభుత్వం నిరంతరం కృషి చేస్తోందని ఈ సందర్భంగా ఆయన స్పష్టం చేశారు.
గ్రామాల్లో అంతర్గత రహదారులు బాగుంటేనే ప్రజల రాకపోకలు సాఫీగా సాగుతాయని, రవాణా సౌకర్యాలు మరింత సులభతరమవుతాయని ఎమ్మెల్యే వసంత వెంకట కృష్ణప్రసాద్ పేర్కొన్నారు. ప్రభుత్వం కేటాయించిన ప్రతి రూపాయిని సద్వినియోగం చేసుకుంటూ, నాణ్యతా ప్రమాణాలకు ఎక్కడా విఘాతం కలగకుండా పనులను నిర్ణీత గడువులోగా పూర్తి చేయాలని సంబంధిత అధికారులను ఆయన ఆదేశించారు. గ్రామీణ ప్రాంతాల సమగ్రాభివృద్ధికి, ప్రజల జీవన ప్రమాణాలను ఉన్నతీకరించడానికి అవసరమైన మౌలిక సదుపాయాలను దశలవారీగా కల్పిస్తామని హామీనిచ్చారు. ప్రజా సంక్షేమమే ధ్యేయంగా కూటమి ప్రభుత్వం అడుగులు వేస్తోందని ఆయన పునరుద్ఘాటించారు.
శంకుస్థాపన కార్యక్రమానికి ముందు మద్దులపర్వ గ్రామంలోని అభయాంజనేయ స్వామి వారి దేవస్థానంలో ఎమ్మెల్యే ప్రత్యేక పూజలు నిర్వహించి రాష్ట్ర ప్రజల సుభిక్షతను కాంక్షించారు. అనంతరం స్థానికంగా నూతనంగా ఏర్పాటు చేసిన తాగునీటి బోరును ప్రారంభించడంతో పాటు, అనారోగ్యంతో బాధపడుతున్న టీడీపీ కుటుంబ సభ్యులు తీగల అప్పయ్యను స్వయంగా పరామర్శించి ఆరోగ్య పరిస్థితిని ఆరా తీశారు. ఈ కార్యక్రమంలో స్థానిక కూటమి నాయకులు, కార్యకర్తలు మరియు పెద్ద సంఖ్యలో గ్రామస్తులు పాల్గొన్నారు.
Slug: mylavaram-mla-vasantha-krishna-prasad-maddulaparva-cc-roads-inauguration