జన గళం ఆంధ్రప్రదేశ్ డెస్క్: మచిలీపట్నం పరిసర ప్రాంతాల ఫోటోగ్రాఫర్లు మరియు వీడియోగ్రాఫర్ల సంక్షేమం, అభివృద్ధిని కాంక్షిస్తూ నూతనంగా ఏర్పాటైన మచిలీపట్నం పరిసర ప్రాంత డాగురె ఫోటో ఇండస్ట్రీ వెల్ఫేర్ అసోసియేషన్ సొసైటీ రిజిస్ట్రేషన్ సందర్భంగా లోగో ఆవిష్కరణ కార్యక్రమం అత్యంత వైభవంగా జరిగింది. మచిలీపట్నంలోని లంకిశెట్టి కార్యాలయంలో నిర్వహించిన ఈ కార్యక్రమంలో రాష్ట్ర ఫోటోగ్రాఫర్స్ మరియు వీడియోగ్రాఫర్స్ సంక్షేమ సంఘం లీగల్ అడ్వైజర్ లంకిశెట్టి బాలాజీ ముఖ్య అతిథిగా విచ్చేసి సంఘం లోగోను అధికారికంగా ఆవిష్కరించారు. రాబోయే స్థానిక సంస్థల ఎన్నికలలో ఫోటోగ్రాఫర్లు, వీడియోగ్రాఫర్ల పాత్ర ఎంతో కీలకమని, ప్రతి ఒక్కరూ తమ విలువైన ఓటు హక్కును నిష్పక్షపాతంగా వినియోగించుకోవాలని ఈ సందర్భంగా ఆయన పిలుపునిచ్చారు.
యూనియన్‌లో అధికారికంగా నమోదు కాబడిన ఫోటోగ్రాఫర్లు, వీడియోగ్రాఫర్లను ప్రభుత్వపరంగా పోలింగ్ కేంద్రాల్లో నియమించడం జరుగుతుందని, ప్రతి ఒక్కరూ ఎంతో బాధ్యతాయుతంగా తమ వంతు పాత్ర పోషించాలని లంకిశెట్టి బాలాజీ సూచించారు. ఈ సందర్భంగా ప్రభుత్వానికి పలు కీలక విజ్ఞప్తులు చేస్తూ, జిల్లా ముఖ్య కేంద్రంలో ఫోటోగ్రాఫర్లు, వీడియోగ్రాఫర్ల కోసం ప్రత్యేకంగా ఫోటో భవన్ నిర్మాణం నిమిత్తం ఐదు సెంట్లు స్థలం కేటాయించాలని కోరారు. అలాగే నేటి యువతరానికి చెందిన ఫోటోగ్రాఫర్లకు నైపుణ్యాభివృద్ధి కేంద్రం ద్వారా తగిన శిక్షణ ఇవ్వాలని, వృద్ధులైన ఫోటోగ్రాఫర్లకు పింఛన్లు మరియు ఇళ్లస్థలాలు మంజూరు చేసేలా ప్రభుత్వం తగిన చర్యలు తీసుకోవాలని ఆయన విజ్ఞప్తి చేశారు.
ఫోటోగ్రాఫర్లు మరియు వీడియోగ్రాఫర్ల సంక్షేమం, అభ్యున్నతి కోసం తమ సంఘం నిరంతరం శ్రమిస్తుందని అసోసియేషన్ అధ్యక్షులు గురిజాల సుధీర్, కార్యదర్శి వంక అనంత కుమార్, కోశాధికారి బైత సత్యనారాయణ ఈ సందర్భంగా స్పష్టం చేశారు. కష్టకాలంలో ఉన్న ఫొటోగ్రాఫర్లకు అండగా నిలుస్తూ సంఘాన్ని మరింత పటిష్టం చేస్తామని తెలిపారు. ఈ కార్యక్రమంలో సంఘం కార్యవర్గ సభ్యులు రవి, రాకేష్, తేజ, హరి, కళ్యాణ్, చిన్న, శేషుబాబు తదితరులు పెద్ద సంఖ్యలో పాల్గొని లంకిశెట్టి బాలాజీని ఘనంగా సన్మానించారు.
Slug: machilipatnam-daguerre-photo-industry-welfare-association-logo-launch